ہیٹی میں ہلاکت خیز زلزلے سے گیارہ افرادہلاک،متعددزخمی

ہیٹی میں ہلاکت خیز زلزلے سے گیارہ افرادہلاک،متعددزخمی

واشنگٹن:7؍اکتوبر(بی این ایس؍ایجنسیاں)
ہیٹی میں شدید زلزلے کے نتیجے میں کم ازکم گیارہ افراد ہلاک جبکہ متعدد زخمی ہو گئے ہیں۔ سن 2010 کے تباہ کن زلزلے کے باعث اس ملک میں دو لاکھ سے زائد افراد ہلاک ہوئے تھے۔اتوار کو آنے والے اس زلزلے کی شدت ریکٹر اسکیل پر 5.9ریکارڈ کی گئی، جس کی وجہ سے بڑے پیمانے پر املاک کو نقصان بھی پہنچا۔ زلزلے کا مرکز شمال مغربی شہر پور ڈے پے سے انیس کلو میٹر دور تھا۔
حکام نے کہا ہے کہ ملک کے شمال مغربی علاقے میں اس قدرتی آفت کی وجہ سے ہونے والی تباہی اور ہلاکتوں کا اندازہ لگانے کی کوششیں کی جا رہی ہیں۔
پور ڈے پے میں اب تک کم از کم سات افراد کی ہلاکت کی تصدیق کی جا چکی ہے۔ ملکی صدر نے اس زلزلے کے بعد اپنے ایک پیغام میں عوام سے پرسکون رہنے کی اپیل کی ہے۔
سن دو ہزار دس میں اس کیریبین ریاست میں آنے والے ایک شدید زلزلے کی تباہی کاریوں کے باعث دو لاکھ افراد ہلاک جبکہ تین لاکھ زخمی ہوئے تھے۔ اس زلزلے کے بعد سے ہیٹی کے عوام ایسی قدرتی آفت کے دوبارہ شکار ہونے کے خدشات میں متبلا رہے ہیں۔
اب کی بار املاک کو زیادہ نقصان ملک کے شمال مغربی ساحلی علاقے میں پیش آیا ہے۔ مقامی حکام کے مطابق یہ اس علاقے کو ملک کا پسماندہ ترین علاقہ تصور کیا جاتا ہے جہاں سڑکیں اور انفرا اسٹرکچر نہ ہونے کے سبب رسائی بھی آسان نہیں ہے۔