ہندوستان

مسلمان سرکاری اور درباری مولویوں سے محتاط رہیں

 

موجودہ ماحول میں لوگ خوف و ہراس میں مبتلا نہ ہوں بلکہ دعوتی فکر کو عام کریں: نوی ممبئی میں علماء کرام کانفرنس سے شرکاء کا اظہار خیال

نوی ممبئی۔۱۱؍اکتوبر:(نامہ نگار) موجودہ ماحول میں سرکاری اور درباری علماء نے امت مسلمہ کو سب سے زیادہ نقصان پہنچایا ہے ۔ماضی میں بھی سرکاری مولویوں نے ہی دین کو رسواکرنے کی کوشش کی ہے لہذا مسلمان سرکاری اور درباری مولویوں سے ہوشیار رہیں ۔ان خیالات کا اظہار معیشت اکیڈمی کی جانب سے نوی ممبئی میں منعقدہ بین المدارس انعامی مقابلہ و علماء کانفرنس میں جید عالم دین علامہ مولاناابوظفر حسان ندوی ازہری نے کیا۔انہوں نے تاریخ اسلام کا حوالہ دیتے ہوئے کہا کہ ’’سخت وسنگین حالات ہمیشہ آئے ہیں لیکن امت اپنے دین و ایمان پر جمی رہی ہے یقیناً اس وقت بھی ملت کو سخت حالات کا سامنا ہے لیکن میں سمجھتا ہوں کہ اگر امت حقیقی معنوں میں مسلمان ہوجائے تو مصیبتیں ختم ہو سکتی ہیں‘‘۔علماء کو نصیحت کرتے ہوئے مولانا نے کہا کہ ’’عالم دین کی ذمہ داری ہے کہ وہ دعوت دین کا فریضہ انجام دے اورجس مقصد کے تحت اللہ تعالی نے اس دنیا میں بھیجا ہے اس کو ادا کرنے کی کوشش کرے ۔‘‘جامعہ اسلامیہ نور باغ کے ذمہ دار مولانافیصل عبد الحکیم مدنی نے ارتداد وانحطاط پر گفتگو کرتے ہوئے کہا کہ ’’اس وقت یہ بات عام ہوگئی ہے کہ مسلم لڑکیاں غیر مسلموں سے شادی کر رہی ہیں جبکہ بسا اوقات مسلم لڑکے ہندو لڑکیوں کے ساتھ بغیر کلمہ پڑھائے شادی کر لے رہے ہیں اور ساتھ ساتھ رہ رہے ہیں انہیں نہ تو ارتداد کےبارے میں علم ہے اور نہ ہی اس بات کا علم ہے کہ وہ فکری طور پر کس قدر انحطاط کا شکار ہیں ۔ایسے میں ضرورت اس بات کی ہے کہ دینی بیداری لائی جائے اور غیر اسلامی رسوم کے بارےمیں گھروں میں بھی بات کی جائے۔‘‘معیشت اکیڈمی اور دانش ریاض کی کوششوں کو سراہتے ہوئے مولانا نے کہا کہ ’’معیشت جن امور پر کام کر رہا ہے ضرورت اس بات کی ہے کہ ان کے ہاتھوں کو مضبوط کیا جائے اور ان لوگوں کو تقویت پہنچائی جائے جو فکری طور پر معاشرے کو بہتر بنانے کی کوشش کر رہے ہیں۔‘‘فیروس فائونڈیشن کے سابق سپر وائزر القرآن اکیڈمی کے سربراہ مولانا عبد البر اثری فلاحی نے قرآنی تعلیمات کے حوالے سے گفتگو کرتے ہوئے کہا کہ ’’لوگوں نے قرآن کو نہ صرف پڑھنا بلکہ سمجھنا بھی چھوڑ دیا ہے۔ جس کا نتیجہ یہ ہے کہ وہ دربدر کی ٹھوکریں کھا رہے ہیں‘‘۔ واضح رہے کہ معیشت میڈیا پرائیویٹ لمیٹڈ نے معیشت اکیڈمی کے اشتراک سے ممبرا کوسہ ،تلوجہ ،پنویل اور نوی ممبئی کے مدارس اسلامیہ کے مابین تحریری و تقریری مقابلے کے ساتھ یک روزہ علماء کرام کانفرنس ’’نور توحید کا اتمام ابھی باقی ہے‘‘المحسنات اینگلو اردو اسکول تربھے نوی ممبئی میں منعقد کیا تھا جس میں دو سو سے زائد علاقےکےعلماء کرام نے شرکت کی اور جید علماء کرام کے ساتھ سماجی تنظیموں کے سربراہان کو سماعت کیا۔جلسہ کو خطاب کرتے ہوئے مرکز فلاح کے صدر علی ایم شمسی نے کہا کہ ’’علماء کرام اگر اپنی ذمہ داری کو محسوس کریں تو مذکورہ شعر ’’نور توحید کا اتمام ابھی باقی ہے ‘‘بخوبی سمجھا جاسکتا ہے کیونکہ علامہ اقبال نے جواب شکوہ میں کہا ہے کہ ’’وقت فرصت ہے کہاں کام ابھی باقی ہے‘‘۔سماجی کارکن الصامت انٹر نیشنل کے مالک غلام پیش امام نے کہا کہ ’’یہ ایک حقیقت ہے کہ حفاظ قرآن کو سمجھ کر نہیں پڑھتے جبکہ علماء کرام قرآن کے مآخذ سے استفادہ نہیں کرتے نتیجتاً دین پھیلانے والے ہی دین سے بے پروا نظر آتے ہیں ‘‘انہوں نے علماء کرام سے معذرت کرتے ہوئے کہا کہ ’’اس وقت دین میں بگاڑ کی ایک وجہ علماء کرام کا دین کو نہ سمجھنا بھی ہے۔‘‘واضح رہے کہ’’ اسلام کا عائلی نظام اور غیر مسلم معاشرے کے اس پر اثرات‘‘کے عنوان سے تحریر کردہ محمد افضل شاہ محمد کے مقالے کو پہلا انعام جبکہ ’’نبی کریم ﷺ کے سماجی تعلقات اور معاشرے پر اس کے اثرات‘‘کے عنوان سے تحریر کردہ خان نصرت شاہ محمدکو دوسرا انعام اور سمیہ محسناتی بنت نسیم اختر انصاری کو ان کے مقالہ’’ اسلام کا عائلی نظام اور غیر مسلم معاشرے کے اس پر اثرات‘‘ پر تیسرا انعام تفویض کیا گیا۔جبکہ تقریری مقابلے میں پہلا انعام محمد بلال دوسرا انعام شیخ اعجاز اور تیسرا انعام محمد عامل کو تفویض کیا گیا اور ساتھ ہی ساتھ تمام شرکاء کو تشجیعی انعامات سے بھی نوازہ گیا۔

Sajid Qasmi

غفران ساجد قاسمی تعلیمی لیاقت : فاضل دارالعلوم دیوبند بانی چیف ایڈیٹر بصیرت آن لائن بانی چیف ایڈیٹر ہفت روزہ ملی بصیرت ممبئی بانی و صدر رابطہ صحافت اسلامی ہند بانی و صدر بصیرت فاؤنڈیشن

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close

Adblock Detected

Please consider supporting us by disabling your ad blocker