یہ ہجر کی شدت مجھے تڑپاتی ہے جاناں

غزل

احمد فاخرؔ

یہ ہجر کی شدت مجھے تڑپاتی ہے جاناں
مشکل یہ حیات اور ہوئی جاتی ہے جاناں

افسانہ نہیں سچ ہے کہ یہ شاعری میری
تم جیسے پری رُخ سے جِلا پاتی ہے جاناں

اَب کیسے کہوں تم سے میں اس غم کا فسانہ
یہ دُوری تمہاری تو جگر کھاتی ہے جاناں

میں چین سے کیسے رہوں اب تم ہی بتاؤ
ہر وقت مجھے یاد تری آتی ہے جاناں

یہ یاد عجب شی ہے، مجھے خون کے آنسو
ہر لمحہ تسلسل سے یہ رُلواتی ہے جاناں

سوچا تھا کبھی، بھول میں جاؤں تمھیں؛ لیکن
یہ بات خیالوں سے کہاں جاتی ہے جاناں

یہ تم ہی بتاؤ میں جیوں کس کے سہارے
اب زندگی دشوار نظر آتی ہے جاناں

اَب لوٹ کے آجاؤ جدائی نہ سہی جائے
ٹوٹے ہوئے دل سے یہ صدا آتی ہے جاناں

کیا خوب تماشا ہے کہ فاخرؔکی ہر اک آہ
اَب عرش سے ٹکرا کے یہ لوٹ آتی ہے جاناں
٭٭٭