القاعدہ سے تعلق کا الزام،دو مشتبہ افراد گرفتار

ملزمین بنگال میں بڑے پیمانے پر تباہی مچانے والے تھے، پوچھ تاچھ میں انکشاف
کولکاتہ۔۱۸؍اگست:  مغربی بنگال پولیس کی خصوصی ٹاسک فورس (ایس ٹی ایف) نے بدھ کی رات دیر گئے مغربی بنگال کے شمالی 24 پرگنہ ضلع کے شاشن نامی گاؤں سے القاعدہ سے تعلق رکھنے کے الزام میں دو مشتبہ لوگوں کو گرفتار کیاہے۔گرفتار ہونے والوں میں رقیب سرکار اور قاضی احسان اللہ شامل ہیں۔ ایس ٹی ایف ذرائع نے بتایا کہ دونوں القاعدہ انڈین برصغیر (AQIS) کے رکن تھے۔ سرکار، مغربی بنگال کا آپریشن انچارج تھا۔دونوں کی گرفتاری کو مغربی بنگال میں انسداد دہشت گردی کی سرگرمیوں میں ایک بڑی کامیابی قرار دیا جا رہا ہے۔ معلوم ہوا ہے کہ سرکار اور قاضی احسان اللہ کے خلاف ریاست کے مختلف تھانوں میں کئی مقدمات درج ہیں۔ دونوں ایس ٹی ایف کو طویل عرصے سے مطلوب تھے۔پولیس کے مطابق ان کے قبضے سے دہشت گردی سے متعلق متعدد کتابیں، پروپیگنڈا پمفلٹس، ڈائریاں، کمپیوٹر ہارڈ ڈسک، پین ڈرائیوز، متعدد موبائل فونز اور موبائل سم کارڈز برآمد ہوئے ہیں۔دریں اثناء مغربی بنگال پولیس کی اسپیشل ٹاسک فورس (ایس ٹی ایف) کے ذریعہ گرفتار کیے گئے القاعدہ کے دونوں دہشت گرد کولکاتہ کے علاوہ جنوبی بنگال کے مختلف مقامات پر بڑی وارداتیں کرنے والے تھے۔ دونوں سے پوچھ گچھ کے دوران یہ چونکا دینے والا انکشاف سامنے آیا ہے۔القاعدہ کی ہندوستانی شاخ کے رکن عبدالرقیب سے پوچھ گچھ کے بعد کئی اہم معلومات ایس ٹی ایف کے ہاتھ آئی ہیں۔ ذرائع کے مطابق برصغیر پاک و ہند میں القاعدہ یا اکیس کے ارکان شمالی بنگال سے لے کر جنوبی بنگال تک تنظیم میں کام کر رہے ہیں۔ معلوم ہوا ہے کہ دارالحکومت کولکاتہ کے علاوہ جنوبی بنگال کے مختلف مقامات پر دہشت گردانہ کارروائیاں کرنے والے تھے۔ اس کے علاوہ ان کا مقصد نئے دہشت گردوں کو بھرتی کرنا اور انہیں تربیت اور فنڈز فراہم کرنا تھا۔ ان سے پوچھ گچھ کے دوران یہ معلوم ہوا ہے کہ کولکاتہ کے علاوہ شمالی اور جنوبی 24 پرگنہ اور اس سے ملحقہ مسلم اکثریتی علاقوں میں ان کے دو درجن سے زیادہ ایسے ساتھی ہیں جو بنیاد پرست ذہنیت کے حامل ہیں۔