’’میں نے یہ گجرات بنایا‘‘وزیراعظم مودی نے گجراتی میں دیا انتخابی نعرہ

نئی دہلی(ایجنسی)گجرات انتخابات کی تاریخوں کےاعلان کے بعد سے ہی تمام پارٹیاں انتخابی موڈ میں نظر آ رہی ہیں۔ اتوار کو وزیراعظم مودی نے ریاست میں ہونے والے انتخابات کے حوالے سے ’’میں نے یہ گجرات بنایا‘‘ کا نعرہ دیا۔ پی ایم مودی نے یہ نعرہ گجراتی زبان میں شروع کیا ہے۔ گجرات میں ایک ریلی سے خطاب کرتے ہوئے پی ایم مودی نے کہا کہ ہر گجراتی خوداعتمادی سے بھرا ہوا ہے، اسی لیے ہر گجراتی بولتا ہے، ضمیر کی آواز بولتی ہے، ہر آواز گجرات کے دل سے آتی ہے، میں نے یہ گجرات بنایا ہے۔ اپنی تقریر کے دوران پی ایم مودی نے کہا کہ آ گجرات، میں بناو چے (میں نے یہ گجرات بنایا ہے) جس کے بعد انہوں نے وہاں موجود لوگوں سے ریلی کے دوران یہ نعرہ کئی بار دہرانے کو بھی کہا۔
انہوں نے کہا کہ منافرت پھیلانے میں مصروف تفرقہ باز طاقتیں جنہوں نے گجرات کو بدنام اور رسوا کرنے کی کوشش کی ہے انہیں گجرات سے باہر کا راستہ دکھا دیا گیا ہے۔ اس الیکشن میں بھی ان کا مستقبل یہی ہوگا۔دہلی میں بیٹھ کر مجھے اطلاعات مل رہی ہیں کہ بی جے پی اس بار ریکارڈ ووٹوں سے گجرات جیتے گی۔ میں یہاں اپنا پرانا ریکارڈ توڑنے آیا ہوں۔ میں نے گجرات بی جے پی سے کہا ہے کہ میں انتخابی مہم کے لیے آپ کو زیادہ سے زیادہ وقت دینے کے لیے تیار ہوں۔
آپ کو بتاتے چلیں کہ گجرات میں بی جے پی نے پارٹی کے کسی ایم ایل اے یا ایم پی کے رشتہ داروں کو ٹکٹ نہ دینے کا فیصلہ کیا ہے۔ ریاستی بی جے پی پارلیمانی بورڈ نے یہ فیصلہ لیا ہے۔ بھروچ کے بی جے پی ایم پی منسکھ وساوا کی بیٹی نے ٹکٹ مانگا تھا، لیکن بی جے پی نے واضح کردیا کہ کسی رکن اسمبلی یا ایم ایل اے کے رشتہ دار کو اسمبلی ٹکٹ نہیں دیا جائے گا۔
منسکھ وساوا نے خود ٹویٹ کرکے یہ جانکاری دی۔ وساوا نے کہا کہ وہ پارٹی کے فیصلے کا خیر مقدم کرتے ہیں۔ پارٹی جس کو بھی ٹکٹ دے گی اس کی جیت یقینی بنانے کے لیے کام کریں گے۔ دریں اثنا، گجرات میں ٹکٹ کا فیصلہ کرنے کے لیے وزیر داخلہ امت شاہ کی صدارت میں ریاستی الیکشن کمیٹی کی میٹنگ آج تیسرے دن بھی جاری ہے۔
واضح رہے کہ 182 سیٹوں والی گجرات اسمبلی کے انتخابات دو مرحلوں میں ہوں گے۔ پہلے مرحلے کے تحت یکم دسمبر اور دوسرے مرحلے میں 5 دسمبر کو ووٹ ڈالے جائیں گے۔ اس کے ساتھ ہی ہماچل پردیش اسمبلی انتخابات کے نتائج کے ساتھ 8 دسمبر کو نتائج کا اعلان کیا جائے گا۔