کیامیں آپ کے قدموں میں پڑکراپناحق مانگوں؟جی ایس ٹی پرممتابنرجی نے کیاوزیراعظم مودی پرطنز

کولکاتا(ایجنسی) مغربی بنگال کی وزیر اعلیٰ ممتا بنرجی نے منگل کے روز مرکزی حکومت پر حملہ کرتے ہوئے یہ دعویٰ کیا کہ وزیر اعظم نریندر مودی کی قیادت والی بی جے پی کی حکومت جی ایس ٹی اور مختلف مرکزی اسکیموں کے تحت بنگال کے واجبات کو روک رہی ہے۔ جھارگرام میں قبائلی آؤٹ ریچ پروگرام میں حصہ لیتے ہوئے، بنگال کی وزیراعلیٰ نے کہا کہ 100 دن کی روزگار کی گارنٹی اسکیم فنڈ لازمی ہے۔ میں اس بارے میں ایک سال قبل وزیراعظم سے بھی ملی تھی، کیا اب آپ کےپاؤںپکڑ کر درخواست کروں؟
بی جے پی کو نشانہ بناتے ہوئے ممتا بنرجی نے کہا، ’’کیا ہم جمہوریت میں رہ رہے ہیں؟ یا ہندوستان ایک پارٹی کاملک بن گیا ہے؟‘‘
آزادی پسند برسا منڈا کو خراج عقیدت پیش کرتے ہوئے، انہوں نے کہا، ’’ہمیں ہمارے واجبات دیں، یہ ہمارا پیسہ ہے، ورنہ جی ایس ٹی کو ختم کر دیں۔ آپ ہمیں 100 دن کی روزگار سکیم کے ہمارے واجبات ادا کریں یا اپنی کرسی چھوڑ دیں۔‘‘
وزیراعلیٰ نے کہا، ’’وہ بنگال کو فنڈز روکنے کی دھمکی دیتے ہیں۔ ہم جی ایس ٹی کو بھی روک سکتے ہیں۔‘‘بی جے پی کی قیادت والی حکومت پر سخت حملہ کرتے ہوئے ممتابنرجی نے کہا، ’’آپ یہاں ٹیکس جمع نہیں کر سکتے اور ہمارے جائز واجبات کو روک نہیں سکتے۔ آپ بنگال کے لوگوں کو ان کا حق نہیں دے رہے ہیں۔‘‘
ممتا بنرجی نے بی جے پی کے سویندو ادھیکاری پر بھی حملہ کیا، جنہوں نے کل کہا کہ مرکزی حکومت بدعنوانی کے پیش نظر مغربی بنگال کو مختلف اسکیموں کے تحت فنڈز روک دے گی۔
ادھیکاری کو نشانہ بناتے ہوئے وزیر اعلیٰ نے کہا، ’’ایک دن، ایسے سیاست دان زیروہو جائیں گے اگر وہ بنگال کو نقصان پہنچاتے رہیں گے۔ جب ان اسکیموں کو لاگو کرنے کی بات آتی ہے، تو ہم سرفہرست ریاستوں میں شمار ہوتے ہیں، چاہے وہ 100 دن کا کام ہو یا گرامین۔ سڑک یوجنا، یا بنگلہ ہاؤسنگ اسکیم۔‘‘
جھارگرام میں ایک پروگرام میں سامعین سے خطاب کرتے ہوئے، انہوں نے قبائلیوں پر زور دیا کہ وہ سڑکوں پر آئیں اور دھرنے پر بیٹھیں اگر ان کے جائز دعوے مسترد کیے جاتے ہیں اور ان کے واجبات کو روک دیا جاتا ہے۔