ایس ڈی پی آئی کی طرف سے 6 روزہ ”چلو بیلگام ریلی“ سوورنا سودھا پر اختتام پذیر وزیر شرن پرکاش پاٹل نے وزیر اعلی کی جانب سے ایس ڈی پی آئی کے تین مطالبات پر مشتمل عرضداشت وصول کیا۔

بیلگام: 12؍ دسمبر 2023ء (پریس ریلیز) سوشل ڈیموکریٹک پارٹی آف انڈیا (SDPI) کرناٹک کی جانب سے کانتا راج کمیشن کی ذات پات کی مردم شماری رپورٹ کو قبول کرکے اسے عام کرنے، سداشیو کمیشن کی رپورٹ کی بنیا د پر اندرونی ریزرویشن لاگو کئے جانے اور 2Bریزویشن کو بحا ل کرنے اور اسے بڑھا کر 8%فیصد کرنے کے تین اہم مطالبات کو لیکر سماجی انصاف کیلئے امبیڈکر جتھا (ریلی) کا آغاز گزشتہ 6؍دسمبر 2023ء کو ودھان سودھا بنگلور سے ہوا تھا اور یہ جتھا (ریلی) ریاست کے تقریبا 10اضلاع جس میں ٹمکور، چتردرگا، وجیا نگر، کوپل، رائچور، یادگیر، بیجاپور اور باگلکوٹ سے ہوتے ہوئے 11دسمبر کو سوورنا سودھا، بیلگام کے قریب اختتام پذیر ہوا۔ ریلی کے اختتام میں سوورنا سودھا کے قریب جلسہ عام کا انعقاد کیا گیا۔ جلسہ عام سے خطاب کرتے ہوئے اس مہم کے کنوینر اور پارٹی کے ریاستی جنرل سکریٹری بی آر بھاسکر پرساد نے کہا کہ ”سدارامیا نے انتخابی مہم کے دوران وعدہ کیا تھا کہ اگر وہ اقتدار میں آئے تو اسمبلی کے پہلے اجلاس میں کانتاراج کمیشن کی رپورٹ کو عوام کے سامنے لانے اور 2Bریزرویشن کو بحال کریں گے۔ بھاسکر پرساد نے الزام لگایا کہ حکومت اقتدار میں آنے کے بعد عوا کو دھوکا دے رہی ہے۔“

ایس ڈی پی آئی کے ریاستی صدر عبدالمجید نے اپنی تقریر میں کہا کہ ”سماجی انصاف کے تحت ریاست کے تمام شہریوں کو مساوی مواقع، حقوق اور وسائل کی تقسیم ہونی چاہیے۔ تمام پارٹیوں کا کہنا ہے کہ ہم سب کو یکساں حقوق اور مواقع فراہم کرنے کا ارادہ رکھتے ہیں، لیکن جب ان کی پارٹی کی حکومت آتی ہے تو وہ مظلوم اور غیر مراعات یافتہ طبقوں کے ساتھ غداری کرتے رہتے ہیں۔ انہوں نے ریاستی حکومت پر زور دیتے ہوئے کہا کہ حکومت کو فوری طور پر کانتاراج کمیشن رپورٹ کو قبول کرکے اسے منظر عام لاناچاہیے اور سداشیو کمیشن کی رپورٹ کی مرکزی حکومت سے سفارش کرنی چاہیے۔“

اجلاس میں تشریف لاکر کرناٹک کے میڈیل ایجوکیشن اینڈ اسکل ڈیولپمنٹ کے وزیر شرن پرکاش پاٹل نے وزیر اعلی سدارامیا سے مخاطب مذکورہ تین مطالبات پر مشتمل عرضداشت (میمورنڈم) وصول کیا۔

ریاستی جنرل سکریٹری افسر کوڈلی پیٹ نے 2Bریزرویشن کو 4فیصد سے بڑھا کر 8%فیصد کرنے کا مطالبہ کیا جو اس مہم کا اہم مطالبہ ہے۔ ایس ڈی پی آئی ریاستی کمیٹی رکن ریاض کذمبو نے پروگرام سے خطاب کرتے ہوئے کہا کہ ”اگر ایس ڈی پی آئی پارٹی کے مطالبات کا جواب نہیں دیا گیا تو آنے والے دنوں میں پارٹی اس لڑائی کو تیز کردے گی اور حکومت کے لیے اسے روکنا ناممکن ہوسکتا ہے۔“ اس جلسے میں قومی کمیٹی کے رکن عبدالحنان، ریاستی خزانچی اسحاق خالد حسین، ریاستی سکریٹریز آنند میتابل، مجاہد پاشا، اشرف ماچار اور ریاستی کمیٹی رکن امجد خان میسور، یمنا پاگنڈال، رمضان کڈیوال اور کسان لیڈران سمیت ہزاروں پارٹی کارکنان اور عوام موجود رہے۔