جامعہ اسلامیہ شانتاپورم کیرالا میں جلسہ تقسیم اسناد کی تیاری شباب پر ۔

شانتاپورم: 16؍ دسمبر 2023ء (کاشف حسن) جامعہ اسلامیہ شانتاپورم میں امسال بڑے پیمانے پر دوروزہ جلسہ تقسیم اسناد کا پروگرام 30 اور 31 دسمبر 2023ء منعقد ہونے جا رہا ہے، جس میں ملک و بیرون ملک سے علماء کرام، دانشواران، سماجی کارکنان، اور سیاسی لیڈران تشریف لارہے ہیں۔ یہ اجلاس مختلف پروگرام پر مشتمل ہوگا جس میں اکیڈمک کانفرنس، لیڈرس میٹ، تقسیم اسناد اور ثقافتی پروگرام شامل ہیں۔
ان پروگرام میں ہندوستان کے مختلف مکاتب فکر سے تعلق رکھنے والے علمااکرام، سماجی کارکنان کے علاوہ سیاسی لیڈران ودانشوران مختلف موضوعات پراظہال خیال فرمائیں گے۔ اسی طرح ملیالم اور اردو زبان میں متوازی اجلاس ایک ساتھ منعقد کیے جائیں گے. اردو زبان کے تحت اردو کانفرس منعقد کی جائے گی، اردو کانفرنس میں اردوداں دانشوران قوم وعلماء امت اور قائدین ملت مختلف عناوین پر اظہار خیال کریں گے۔
جن میں تین عناوین بہت اہم ہیں:
1. ہندوستان کے دینی تعلیمی ادارے، خصوصیات اور استفادے کی راہیں
2. ہندستانی مسلمانوں کا مستقبل
3. فلسطین: ادبا اور شعرا کی نظر میں
ان تین عناوین کے تحت ہندوستان کے مختلف صوبوں سے تعلق رکھنے والے مہمانان عظام اپنی قیمتی ووقیع آرا پیش کریں گے۔

معزز مہمانوں کی فہرست میں سے کچھ اہم نام مندرجہ ذیل ہیں:
1. حضرت مولانا محمد فضل الرحیم مجددی صاحب (جنرل سکریٹری آل انڈیا مسلم پرسنل لابورڈ)
2. محترم جناب انجینئر سید سعادت اللہ حسینی صاحب (امیر جماعت اسلامی ہند)
3. حضرت مولانا مفتی ثناءالہدی قاسمی صاحب (نائب ناظم امارت شرعیہ بہار، اڈیشہ و جھارکھنڈ)
4. ڈاکٹر محی الدين غازی صاحب (سكريٹری تصنیفی اکیڈمی جماعت اسلامی ہند)
5. مولانا کمال اختر ندوی صاحب (استاذ تفسیر، دارالعلوم ندوة العلماء لکھنؤ)
6. مولانا عبدالسبحان ندوی ناخدا صاحب بھٹکلی (نائب ناظم مدرسہ ضیاء العلوم رائے بریلی، تکیہ کلاں یوپی)
7. مولانا عمر عابدین قاسمی مدنی صاحب (ڈپٹی ڈائریکٹر المعہد العالی الإسلامی حيدرآباد، وجنرل سکریٹری آل انڈیا ملی کونسل تلنگانہ)
8. مولانا محمد رفیع کلوری عمری صاحب (مدیر ادارہ تحقیقات اسلامی،جامعہ دارالسلام عمرآباد و مدیر اعلی ماہنامہ راہ اعتدال عمرآباد)
9. محترم جناب عبد القدیر صاحب
(چیئرمین شاہین گروپ آف انسٹی ٹیوٹ)
10. محترم جناب احمد حسن عمران صاحب (سابق راجیہ سبھا ایم پی
ایڈیٹر ڈیلی نیوز پیپر ”کالم“ کولکاتہ، مغربی بنگال)
11. ڈاکٹر محمد ہاشم ندوى صاحب(اسسٹنٹ پروفیسر، پی جی سیکشن، دار الہدى، كيرلا)
اور جامعہ اسلامیہ شانتاپورم کی طرف سے نمائندگی کرتے ہوئےمولانا عبدالرحمن فلاحی صاحب (اسسٹنٹ پروفیسر الجامعۃ الاسلامیۃ شانتاپورم، کیرالا) ان پروگرام اظہار خیال کریں گے۔ واضح رہے کہ جامعہ اسلامیہ شانتاپورم کیرلا ہندوستان میں جدید طرز کی منفرد یونیورسٹی ہے،جہاں جدید طرز پر دینی تعلیم کے ساتھ عصری تعلیم کا بھی لحاظ رکھا گیا ہے، اور اسلامی خطوط پر نئی نسل کی مکمل تربیت اور شخصیت سازی کا کام انجام دیا جاتا ہے، اسی طرح مختلف سطح پر ملت اسلامیہ کے لیے قیادت فراہم کرنا بھی یونیورسٹی کے بنیادی مقاصد میں شامل ہے۔