اسرائیلی مظالم پر بالی ووڈ کی خاموشی "خان نشانہ بنے 

ممبئی (ذرائع) فلسطینیوں پر اسرائیلی مظالم پر دنیا بھر میں کہرام بپا ہے، امریکہ اور یوروپی ممالک میں مظاہرے ہورہے ہیں مگر بالی وڈ خاموش ہے۔خاص طور پر تینوں سپر اسٹار خان ایک لفظ نہیں بول رہے ہیں۔ اسرائیل کی جانب سے فلسطین پر زبردستی مسلط کی گئی جنگ کے دوران دلخراش مناظر و نسل کشی کے خلاف دنیا بھر سے غیر مسلموں نے بھی آوازیں اٹھائی ہیں، ایسے میں بالی ووڈ خانز کی خاموشی سوالیہ نشان بن گئی۔

زندگی کے ہر شعبے سے تعلق رکھنے والی کئی عالمی شخصیات فلسطین کی حمایت میں سامنے آ چکی ہیں اور اسرائیل کی بربریت پر غم، غصے، افسوس اور دکھ کا اظہار کر رہی ہیں۔ فلسطینیوں پر ہوتے تاریخی ظلم و جبر کو دیکھ کر ان کے حق میں آواز اٹھانے والے افراد رنگ، نسل اور مذہب سے باہر نکل کر اسرائیل کو دہشت گرد ملک قرار دینے پر مجبور ہو گئے ہیں۔

دوسری جانب اگر دیکھا جائے تو بالی وڈ کے متعدد ستاروں سمیت عام و خاص شخصیات بھی فلسطینیوں سے اظہارِ یکجہتی اور فلسطین خصوصاً غزہ کے علاقے رفح میں جاری حالیہ بمباری اور اسرائیلی فوجیوں کی کارروائیوں کی مذمت کر رہے ہیں۔ خانز کی اسی خاموشی کے سبب شاہ رخ خان، سلمان خان اور عامر خان سوشل میڈیا صارفین کی جانب سے کڑی تنقید کی زد میں ہیں۔ نیٹیزنز کا کہنا ہے کہ جہاں ان گنت اہم شخصیات نے فلسطین کے حق میں آواز اٹھائی ہے وہیں بالی ووڈ خانز کو بھی مظلوموں کی وکالت کے لیے اپنے پلیٹ فارمز کا استعمال کرنا چاہیے۔

واضح رہے کہ بالی ووڈ کی یہ تینوں مشہور شخصیات اپنے عالمی مداحوں کی تعداد پر فخر کرتی ہیں لیکن اِنہوں نے غزہ کی پٹی میں اسرائیلی مظالم کے خلاف کھل کر بات کرنے سے گریز کیا ہے۔ میڈیا رپورٹس میں تینوں خانز کی خاموشی کو ہندو انتہا پسندوں کے ردعمل کے خوف سے منسوب کیا جا رہا ہے۔ واضح رہے کہ انتہا پسند ہندوؤں کی جانب سے تینوں خانز کو متعدد بار جان سے مارنے کی دھمکیاں بھی دی جا چکی ہیں۔

دریں اثنا نامور اداکارہ مادھوری دکشت کو بھی رفح کے حق میں پوسٹ کرنے کے بعد ڈیلیٹ کرنا پڑا۔ اسپر کچھ سوشل میڈیا صارفین کی جانب سے افسوس کا اظہار کیا گیا۔ اسرائیل اپنی جارحیت جاری رکھتے ہوئے رفح کے پناہ گزینوں کے کیمپ پر بھی بمباری کردی میں متعدد فلسطینی شہید ہوگئے۔ جہاں دنیا بھر میں لوگ اسرائیل کی اس کارروائی پر اسے تنقید کا نشانہ بنا رہے ہیں وہیں بالی ووڈ شخصیات نے بھی سوشل میڈیا پر آل آئز آن رفح کے ٹرینڈ میں شرکت کی۔

ان میں بالی ووڈ کی نامور اداکارہ مادھوری دکشت بھی شامل تھیں جنہوں نے فوٹوز اینڈ ویڈیوز شیئرنگ پلیٹ فارم انسٹاگرام اسٹوری پر فلسطینیوں سے اظہار یکجہتی کیا۔ تاہم سوشل میڈیا پر انہیں انکے اس پیغام پر تنقید کا نشانہ بنایا گیا جس کے بعد انہیں اپنی سوشل میڈیا پوسٹ ڈیلیٹ کرنی پڑ گئی۔ ایک صارف نے لکھا کہ کچھ لوگوں کے نظریے کی وجہ سے مادھوری کو پوسٹ ڈیلیٹ کرنی پڑی، اس سے بہت مایوسی ہوئی۔ علاوہ ازیں کچھ صارفین مادھوری کے حق میں جبکہ کچھ انکے خلاف پیغامات جاری کرتے رہے۔ اس سے پہلے کرکٹر روہت شرما کی اہلیہ کو فلسطینیوں کے حق میں شیئر کی گئی پوسٹ حذف کرنا پڑ گئی تھی۔