بورڈ کے عمومی پروگرام دوبارہ شروع، ملک کے کئی اہم شہروں میں اس ماہ میں ہونے والے پروگرام کی تفصیلات

نئی دہلی، 18 مئی 2025

سیندور آپریشن اور ملک میں پیدا ہونے والی ہنگامی صورت حال کے پیش نظر تحفظ اوقاف مہم کے جو عوامی اجتماعات 16 مئی تک روک دئے گئے تھے، اب وہ دوبارہ بحال ہوگئے ہیں۔

آل انڈیا مسلم پرسنل لا بورڈ کے قومی ترجمان اور کل ھند تحفظ اوقاف کمیٹی کے کنوینر ڈاکٹر سید قاسم رسول الیاس نے ایک پریس بیان میں کہا ہے کہ سیندور آپریشن اور اس کے نتیجہ میں ملک میں پیدا ہونے والی ہنگامی صورت حال کی بناء پر بورڈ کی تحفظ اوقاف مہم کے جن عمومی پروگراموں ( پبلک میٹینگس، دھرنے اور ریلیز ) کو روک دیا گیا تھا اب وہ سب آج سے الحمداللہ بحال ہوگئے ہیں۔ البتہ اس دوران بھی انڈور پروگرام جیسے سول سوسائٹی کے ساتھ راؤنڈ ٹیبل میٹینگیں، انٹر فیتھ میٹینگس، پریس کانفرینس اور کلکٹر یا ڈی ایم کے ذریعہ صدر جمہوریہ کو دئے جانے والے میمورنڈم کا سلسلہ حسب معمول جاری رہا۔ اس ماہ مختلف ریاستوں کے کئی اہم شہروں میں خطابات عام، راؤنڈ ٹیبل مٹینگیں، خواتین کے بڑے بڑے جلسے منعقد کئے جارہے ہیں۔

تحفظ اوقاف کمیٹی کے کنوینر کے مطابق حسب ذیل شہروں میں جو پروگرام منعقد ہورہے ہیں وہ کچھ اس طرح ہیں

حیدر آباد ( ریاست تلنگانہ ):

18 مئی۔ راؤنڈ ٹیبل مٹینگ: جس میں شہر کے کئی اہم سیاسی رہنماء، دانشور اور سول سوسائٹی کے اہم افراد کی شرکت متوقع ہے۔

22,مئی ۔ خطاب عام برائے خواتین: اس جلسہ میں بورڈ کے ذمہ داران، کئی اہم ممبران پارلیمنٹ، سول سوسائٹی کی شخصیات اور وومن ونگس کی کنوینرس خطاب فرمائیں گیں۔ اس کی تیاریاں زور شور سے جاری ہیں۔ توقع ہے کہ اس جلسہ میں پورے شہر سے تقریباً ایک لاکھ خواتین شرکت کرینگی۔

20 مئی، ورنگل: ایک بڑے خطاب عام کا انعقاد کیا جارہا ہے، جس میں بھی کئی اہم سیاسی و غیر سیاسی شخصیات شرکت فرمائینگیں۔ اس جلسہ میں ایک لاکھ سے زائد افراد کی شرکت متوقع ہے۔

30 مئی، شہر نظام آباد: مشرقی ضلع نظام آبادریاست تلنگانہ کا ایک اہم شہر ہے۔ یہاں بھی ایک جلسہ عام کا اہتمام کیا گیا ہے جس میں پورے ضلع سے کثیر تعداد میں لوگوں کی شرکت متوقع ہے۔

ریاست مہاراشٹر:

23 مئی، جل گاؤں: ریاست مہاراشٹرا کے قلب میں واقع جل گاؤں، خاندیش کا ایک اہم شہر ہے۔ یہان ایک پبلک میٹنگ کا اہتمام کیا گیا۔ توقع ہے کہ پورے ضلع سے اس میں ستر سے اسی ہزار افراد شرکت فرمائیں گے۔

24 مئی، نانڈیڑ: نانڈیڑ مرہٹواڑہ کا ایک اہم شہر ہے۔ یہان ایک بڑے جلسے کی تیاریاں بڑے زور شور سے جاری ہیں۔ توقع ہے کہ اس میں بڑی تعداد میں ہندو اور سکھ بھائی بھی شریک ہونگے۔ مقررین میں بھی ہندوؤں اور سکھوں کی نمائندگی ہوگی۔

25 مئی، اورنگ آباد: اورنگ آباد مرہٹواڑہ کا مرکزی شہر ہے۔ یہ شہر سیاسی اور تعلیمی اعتبار سے بھی بہت اہم ہے۔ توقع ہے کہ یہان کا جلسہ عام اب تک ہوئے تمام جلسوں کا ریکارڈ توڑدے گا۔ دو لاکھ سے بھی زائد افراد کی شرکت متوقع ہے۔

ریاست بہار :

ریاست بہار کے متعدد شہروں میں مسلم پرسنل لا بورڈ کی ہدایت پر امارت شرعیہ بہار اڈیشہ وجھارکھنڈ نیز دیگر ملی تنظیموں نے متحدہ طورپر متعدد بڑے پرو گرام منعقد کئےہیں ۔ ان شہروں میں بطور خاص پٹنہ ،کشن گنج ،ارریہ ،بھاگلپور ،بیگوسرائے،سہرسہ،مدھوبنی ،سیوان اور دربھنگہ شامل ہیں ۔یہ ریاست اس لئے بھی اھم ہیکہ یہاں تین چار ماہ بعد ریاستی انتخابات ہونے والے ہیں۔ اندازہ ہے کہ پروگرام اسمبلی انتخابات کے نتائج پر بھی اثر انداز ہوسکتے ہیں ۔

مذکورہ بالا پروگراموں کے علاوہ کئی دیگر ریاستوں میں بھی جہان کے تمام بڑے پروگرام ملک کے حالات کی بناء پر ملتوی ہوگئے تھے، جیسے ریاست کیرالہ، تامل ناڈو، آندھرا پردیش، گجرات، راجستھان، جھار کھنڈ اور مغربی بنگال میں بھی بڑے پروگراموں کے لئے ہلچل شروع ہوگئی ہے۔

کنوینر کمیٹی نے بتایا کہ ان پروگراموں سے جہان حکومت جھوٹے سے برادران وطن میں جو غلط فہمیان پیدا ہوگئی تھیں ان کے ازالہ کا موقع مل رہا ہے وہیں دوسری طرف مسلمانوں کو بھی حکومت کے ناپاک عزائم کا ادراک ہوتا جارہا ہے۔ اسی کے ساتھ ساتھ تفریق پر مبنی اور دستور سے متصادم ترمیمات کو ختم کرنے کے لئے نہ صرف رائے عامہ ہموار ہورہی ہے بلکہ لوگوں کے اضطراب اور بے چینی میں بھی اضافہ ہورہا ہے۔

ڈاکٹر الیاس نے کہا کہ ہمیں پوری توقع ہے کہ سپریم کورٹ تفریق پر مبنی اور دستور ہند سے متصادم ترمیمات اور مسلمانوں کے دستوری حقوق کو چھینے کی حکومت کے ارادوں کو بخوبی محسوس کرے گا اور ان کے تدارک کے اقدامات بھی کرے گا۔ ہمیں پوری امید ہے عدالت عظمی آئندہ 20 مئی کو کئی ترمیمات پر عبوری راحت دے گی.