راجستھان : تانترک کے کہنے پر چچا نے بھتیجے کی قربانی دی، بیوی کو اپنے خون اور جگر سے قابو کرنے کی سازش!

کانپور (مائرا فاطمہ) الور ضلع کے منڈاور تھانہ علاقہ کے سرائے کلا گاؤں میں 6 سالہ معصوم لوکیش کے قتل کے معاملے میں پولس نے سنسنی خیز انکشاف کیا ہے۔

پولیس کا کہنا ہے کہ معصوم بچے کو اس کے چچا نے قربان کیا۔ چچا کی بیوی کچھ عرصہ پہلے اسے چھوڑ کر چلی گئی تھی۔

اپنی بیوی کو قابو کرنے کے لیے چچا منوج نے ایک تانترک سنیل سے رابطہ کیا۔ تانترک نے اسے تنتر ودیا کے لیے ایک معصوم بچے کی قربانی دینے اور اس کا خون اور جگر لانے کو کہا۔

یہ واقعہ 19 جولائی کو پیش آیا، جب معصوم لوکیش اچانک لاپتہ ہوگیا۔ اہل خانہ اور پولیس کی تلاش کے دوران لوکیش کی لاش گاؤں کے ایک ویران مکان میں چارے کے ڈھیر سے ملی۔

اس کی گردن پر دباؤ کے نشانات تھے۔ پولس نے تفتیش شروع کی اور شک کی بنیاد پر لوکیش کے چچا منوج کو حراست میں لے لیا۔

پوچھ گچھ کے دوران چچا نے انکشاف کیا کہ تانترک نے 12 ہزار روپے لیے اور بچے کی قربانی کا مطالبہ کیا۔

اس کے بعد اس نے لوکیش کو ایک ویران مکان میں لے جاکر گلا دبا کر قتل کردیا۔

پھر اس نے انجکشن لگا کر خون نکالا اور لاش کو چارے میں چھپا دیا تاکہ بعد میں جگر نکال سکے۔

لیکن اہل خانہ اور پولیس موقع پر پہنچ گئی اور سازش ناکام ہو گئی۔

پولیس نے دونوں چچا منوج اور تانترک سنیل کو گرفتار کر لیا ہے۔

پولیس کا کہنا ہے کہ یہ ایک خوفناک اور توہم پرستی کا معاملہ ہے اور اس کی تفتیش جاری ہے۔