سٹی ایس پی نے لیا سنگھواڑہ تھانہ کا جائزہ،قانون و انتظام کو مؤثر بنانے کی تھانہ انچارج کو ہدایت

جالے (محمد رفیع ساگر/بی این ایس)

نگر پولیس سپرنٹنڈنٹ (سیٹی ایس پی) اشوک کمار نے ہفتہ کے روز سنگھواڑہ تھانہ کا دورہ کرتے ہوئے نظم و نسق ، جرائم پر قابو اور زیر التواء مقدمات کی تحقیقات کے حوالے سے پیش رفت کا جائزہ لیا۔ اس موقع پر انہوں نے تھانہ کے پولیس افسران کو ضروری ہدایات جاری کیں۔

سیٹی ایس پی نے واضح طور پر کہا کہ زیر التواء کیسوں کی تحقیقات کو مقررہ وقت میں مکمل کیا جائے تاکہ جرائم پر مؤثر انداز میں قابو پایا جا سکے۔ انہوں نے آنے والے رجسٹر، تھانہ روزنامچہ، سمن رجسٹر، ناقابلِ ضمانت وارنٹ رجسٹر، قابلِ ضمانت وارنٹ رجسٹر، مالخانہ رجسٹر، حوالات رجسٹر اور او ڈی رجسٹر سمیت تمام اہم رجسٹروں کا باریک بینی سے معائنہ کیا اور ان کو اپ ٹو ڈیٹ رکھنے کی ہدایت دی۔

انہوں نے تفتیش کاروں کو ہدایت دی کہ وہ قتل، ڈکیتی، اغوا، لوٹ جیسے سنگین مقدمات کی تحقیقات ایمانداری، غیرجانبداری اور تیزی کے ساتھ انجام دیں۔ سیٹی ایس پی نے زیر التواء وارنٹ اور ضبطی (قرقی) کی کارروائیوں کو ترجیحی بنیاد پر مکمل کرنے اور علاقے میں چوکسی برقرار رکھنے پر زور دیا۔

انہوں نے کہا کہ جرائم پر قابو پانے اور گشت کو مؤثر بنانے کے لیے خفیہ اطلاعات کے نیٹ ورک کو مضبوط کرنا ہوگا تاکہ پولیسنگ کی کارکردگی میں بہتری لائی جا سکے۔ عوامی شکایات پر فوری کارروائی کرتے ہوئے ان کا جلد از جلد ازالہ کرنے کی ہدایت بھی دی گئی۔

سیٹی ایس پی اشوک کمار نے کہا کہ تھانہ معائنہ اور زیر التواء مقدمات کی جانچ ایک مستقل اور منظم عمل ہے، جس کا مقصد نہ صرف جرائم پر قابو پانا ہے بلکہ قانون و انتظام اور پولیس نظام کو بھی مؤثر بنانا ہے۔

اس موقع پر تھانہ انچارج رنجیت چودھری، تربیتی داروغہ ستیش یادو، وکرانت کمار، کمليش مشر سمیت دیگر پولیس اہلکار موجود تھے۔