جھارکھنڈ : سورین آج اعتماد کا ووٹ حاصل کریں گے

بی جے پی لیجسلیچر پارٹی کی میٹنگ بھی طلب

رانچی۔ ۴؍ستمبر:جھارکھنڈ کےو زیراعلیٰ کے رکن اسمبلی طور پر بنے رہنے کو لے کر جاری رسہ کشی کے درمیان ہیمنت سورین کل پیر کو اسمبلی کے خصوصی سیشن کے دوران اعتماد کا ووٹ حاصل کرنے کے لئے تجویز رکھیں گے۔ ایک عہدیدار نے یہ جانکاری دی۔ اسمبلی سکریٹریٹ کی جانب سے ارکان اسمبلی کو بھیجے گئے مکتوب کے مطابق، وزیراعلیٰ نے اکثریت ثابت کرنے کے لئے اعتماد کا ووٹ لانے کی خواہش ظاہر کی ہے۔پارٹی ذرائع نے بتایا کہ اپوزیشن بھارتیہ جنتا پارٹی (بی جے پی) نے ایوان میں اپنی حکمت عملی تیار کرنے کے لیے اتوار کو مقننہ پارٹی کی میٹنگ بلائی ہے۔ پارلیمانی امور کے وزیر عالمگیر عالم نے کہا کہ "جھارکھنڈ میں غیر یقینی کی صورتحال بنی ہوئی ہے، ہمارے وفد نے جمعرات کو گورنر سے ملاقات کی تھی اور انہوں نے ہمیں ایک دو دن میں صورتحال صاف کرنے کی یقین دہانی کرائی تھی، لیکن ابھی تک کچھ نہیں ہوا۔” اس لئے ہم اسمبلی میں اپنی بات رکھیں گے اور اپنی اکثریت ثابت کریں گے۔بتادیں کہ منافع بخش عہدے کے معاملے میں سورین کو اسمبلی سے نااہل ٹھہرانے کی بی جے پی کی درخواست کے بعد، الیکشن کمیشن (ای سی) نے 25 اگست کو گورنر رمیش بیس کو اپنا فیصلہ بھیجا تھاریاست میں سیاسی بحران پیدا ہو گیا ہے۔ اگرچہ الیکشن کمیشن کا فیصلہ ابھی سرکاری طور پر نہیں کیا گیا ہے، لیکن یہ موضوع بحث بنا ہوا ہے کہ الیکشن کمیشن نے وزیر اعلیٰ کو بطور ایم ایل اے نااہل قرار دینے کی سفارش کی ہے۔