اوکھلا کے ایم ایل اے امانت اللہ خان کی گرفتاری غیر قانونی: ویلفیئر پارٹی آف انڈیا

نئی دہلی:20 ستمبر (پریس ریلیز)اوکھلا کے ایم ایل اے امانت اللہ خان کی اے سی بی کے ذریعہ گرفتاری غیر قانونی ہے اور اس طرح کی کارروائی ہندوستانی جمہوریت کے لیے خطرناک ہے کیونکہ اے سی بی کی طرف سے ان کے گھر پر چھاپے میں اگر کوئی چیز ملی ہے یا نہیں ملی پہلے اس کی جانچ ہونی چاہیے تھی اور اس تفتیش میں اگر وہ قصوروار پایا جائے تب ہی مزید کارروائی ہونی چاہیے تھی۔
جب بھارتیہ جنتا پارٹی اور اس کے لیڈر ملک کو بیچنے کا کام کرتے ہیں۔ کئی سرکاری کمپنیاں سرمایہ داروں کے حوالے کر دی گئی ہیں، محکمہ آثار قدیمہ کی کئی عمارتیں،ریلوے اسٹیشن نیلام ہو چکی ہیں۔ اینٹی کرپشن بیورو، ای ڈی اور سی بی آئی کے افسران تب حرکت میں نہیں آتے ہیں لیکن اپوزیشن کی جو بھی مضبوط آوازیں ہیں ان کو مرکزی حکومت اپنی تحقیقاتی ایجنسیوں کے ذریعہ ڈرانے دھمکانے اور جھوٹے الزامات لگا کر جیلوں میں ڈالنے کی کوشش کر رہی ہے۔ یہ باتیں ویلفیئر پارٹی آف انڈیا دہلی پردیش کے جنرل سیکرٹری مو عارف اخلاق نے امانت اللہ خان کی گرفتاری پر کہیں۔
انہوں نے امانت اللہ خان کی گرفتاری کو غیر آئینی قرار دیتے ہوئے کہا کہ اے سی بی حکام کو ان کے گھر سے کچھ نہیں ملا ہے اور نہ ہی ان کے خلاف ایسا کوئی مقدمہ ہے جس کی بنیاد پر ان کی گرفتاری عمل میں لائی جائے۔
عارف اخلاق نے مزید کہا کہ 2014 کے بعد جتنے بڑے گھوٹالے اس ملک میں ہوئے ہیں، اتنے بڑے گھوٹالے پہلے کبھی نہیں ہوئے، پھر بھی بی جے پی لیڈروں کے خلاف کوئی نہ جانچ ہو تی ہے نہ کارروائی ۔
انہوں نے کہا کہ یہ کتنی بے شرمی کی بات ہے کہ جب ایک بدعنوان لیڈر بی جے پی میں شامل ہوتا ہے تو اس کے خلاف تحقیقات اور سزا کی فائل بند کردی جاتی ہے اور اس کے خلاف تمام مقدمات واپس لے لئے جاتے ہیں، اس سے صاف ظاہر ہوتا ہے کہ بی جے پی بدعنوانی کے خلاف نہیں ہے بلکہ اپوزیشن کو تباہ اور ختم کرنے پر تلی ہوئی ہے، اس لیے ملک کی تمام اپوزیشن جماعتوں کو متحد ہو کر بی جے پی کے خلاف آواز اٹھانے کی ضرورت ہے۔
عارف اخلاق نے عام آدمی پارٹی پر الزام لگاتے ہوئے کہا کہ بی جے پی کی طرح عام آدمی پارٹی بھی مسلم مخالف ذہنیت رکھتی ہے۔ منیش سسودیا اور ستیندر جین کے ساتھ جس طرح پارٹی کھڑی ہو ئی ہے۔ اس طرح عام آدمی پارٹی اپنے مسلم ایم ایل ایے اور کونسلروں کے ساتھ نہ پہلے کھڑی ہو ئی تھی نہ اب کھڑی ہے۔