ہسپتال میں نماز پڑھنے پر مسلم خاتون کےخلاف انتظامیہ سخت 

الہ آباد۔۲۳؍ ستمبر: الہ آباد کے تیج بہادر اسپتال میں خاتون کے نماز پڑھنے کا ویڈیو وائرل ہونے کے بعد اسپتال انتظامیہ نے اس معاملے میں تحقیقات بٹھائی ہے کہ آخر خاتون کو روکنے کی کوشش کیوں نہیں کی آئندہ ایسا نہ ہو اس کےلیے سختی برتنے کا حکم دیاگیا ہے۔ بتایاجارہا ہے کہ اسپتال کے ڈینگو وارڈ میں جیٹھ واڑہ پرتاپ گڑھ کی ۴۰ سالہ خاتون داخل ہے اس کی ایک تیمار دار پلنگ سے کچھ دور جاکر اس کی شفایابی کےلیے نماز حاجت پڑھنے لگی، وہ تقریباً ۱۲ منٹ تک نماز کی حالت میں رہی، لیکن کسی شرپسند نے اس کی ویڈیو بناکر وائرل کردی ۔دی مسلم لائیو کے مطابق خاتون کے خلاف ایف آئی آر درج کرنے کی بات کہی جارہی ہے لیکن پریاگ راج پولس کی جانب سے وائرل خبر کے مطابق ’’وائرل ویڈیو کی تحقیقات میں پایاگیا کہ ویڈیو میں نظر آنے والی خاتون کے ذریعہ بنا کسی غلط ارادے کے کسی کے بھی کام یا ٹریفک متاثر کئیے بغیر اسپتال میں داخل اپنے مریض کی شفایابی کےلیے دعا کرتے ہوئے نماز ادا کی گئی، ان کا یہ فعل کسی جرم کے زمرے میں نہیں آتا ہے‘‘۔