برطانیہ، فرانس اور کینیڈا کی قابض اسرائیل کو غزہ میں جارحیت نہ روکنے کی صورت میں پابندیوں کی دھمکی

بصیرت نیوزڈیسک

برطانیہ، فرانس اور کینیڈا نے قابض اسرائیل کو سخت الفاظ میں خبردار کیا ہے کہ اگر اس نے غزہ پر جاری نسل کشی کا خونی سلسلہ نہ روکا اور انسانی امداد کی راہ میں حائل پابندیاں ختم نہ کیں تو اسے سنگین اقدامات اور ممکنہ پابندیوں کا سامنا کرنا پڑے گا۔

ان تینوں ممالک کے رہنماؤں نے ایک مشترکہ بیان میں قابض اسرائیل سے مطالبہ کیا ہے کہ وہ غزہ میں اپنے فوجی حملے فوراً بند کرے اور امدادی سامان کو فوری طور پر متاثرہ علاقے میں داخل ہونے دے۔ ان کا کہنا تھا کہ قابض اسرائیل کی جانب سے صرف تھوڑی مقدار میں خوراک کی اجازت دینا کسی طور بھی کافی نہیں اور یہ انسانی ضمیر کے ساتھ سنگین مذاق ہے۔

برطانوی، فرانسیسی اور کینیڈین قائدین نے اسرائیلی حکومت کے بعض وزراء کی اشتعال انگیز اور نفرت آمیز زبان اور فلسطینیوں کو جبری طور پر غزہ سے بےدخل کرنے کی دھمکیوں کو بین الاقوامی انسانی قوانین کی کھلی خلاف ورزی قرار دیا۔

انہوں نے خبردار کیا کہ اگر بنجمن نیتن یاھو کی حکومت نے غزہ میں اپنی خونریز کارروائیاں بڑھائیں تو وہ تماشائی نہیں بنے رہیں گے، بلکہ سخت ردعمل دیں گے۔

غزہ کی تباہ کن صورتحال ہر گذرتے لمحے کے ساتھ بدترین ہوتی جا رہی ہے۔ پیر کی صبح قابض اسرائیلی بمباری سے مزید 23 فلسطینی شہید ہو گئے، جن میں سے 16 کا تعلق جنوبی غزہ کے شہر خانیونس سے تھا۔

خانیونس کو صبح شدید اور مسلسل بمباری کا نشانہ بنایا گیا۔ اس دوران قابض اسرائیل کی خفیہ یونٹ نے "المستعربین” کے ذریعے مزاحمتی تنظیم "الویۃ الناصر صلاح الدین” کے رہنما احمد سرحان کو شہید کر دیا، جو دشمن کے خلاف مردانہ وار لڑتے ہوئے اپنی جان قربان کر گئے۔ صہیونی فوج نے شہید کی بیوی اور بچوں کو اغوا کر لیا۔

غزہ اس وقت نہ صرف بموں کی آگ میں جل رہا ہے بلکہ قحط و افلاس کا شکار بھی ہے۔ قابض اسرائیل نے غزہ پر مکمل محاصرہ مسلط کر رکھا ہے، جہاں دوا، غذا، پانی، بجلی، کچھ بھی میسر نہیں۔ ہسپتالوں کو بمباری سے تباہ کر کے طبی نظام کو مکمل طور پر معطل کر دیا گیا ہے۔

یہ سب کچھ ایک منظم نسل کشی کے تحت کیا جا رہا ہے، جس کے نتیجے میں اب تک درجنوں معصوم شہری بھوک، پیاس اور بیماریوں کے ہاتھوں اپنی جانیں گنوا چکے ہیں۔

فلسطینی وزارت صحت کے تازہ ترین اعداد و شمار کے مطابق 7 اکتوبر 2023 سے شروع ہونے والی اس وحشیانہ صہیونی جارحیت میں اب تک 53 ہزار 339 فلسطینی شہید ہو چکے ہیں، جبکہ زخمیوں کی تعداد 1 لاکھ 21 ہزار 34 تک جا پہنچی ہے۔