مالیگاؤں۲۰۰۸ بم دھماکہ معاملہ

خصوصی عدالت نے اے ٹی ایس افسر کے خلاف قابل ضمانت وارنٹ جاری کیا

ممبئی۔ ۲۶؍ستمبر: مالیگاؤں 2008 بم دھماکہ معاملے میں آج خصوصی این آئی اے جج نے سخت قدم اٹھاتے ہوئے عدالت میں گواہی کے لیئے حاضر نہ رہنے والے اے ٹی ایس افسر کے خلاف قابل ضمانت وارنٹ جاری کیا اور حکم دیا کہ وہ13/ اکتوبر کو عدالت میں گواہی دینے کے لیئے حاضر رہے۔خصوصی این آئی اے عدالت میں آج اے پی آئی اروند ساونت(اے ٹی ایس) کو گواہی کے لیئے پیش ہونا تھا لیکن وہ پیش نہیں ہوسکے اور نہ ہی انہوں نے پیش نہ ہونے کی وجہ بتائی، اے ٹی ایس افسر اروند ساونت نے سادھوی پرگیہ سنگھ ٹھاکر سمیت چار ملزمین کا گرفتاری پنچ نامہ تیار کیا تھا اور پنچ اور دیگر چار گواہوں کے بیانات کا اندراج بھی کیا تھا، اروند ساونت کی گواہی کافی اہمیت کی حامل ہے۔گواہ استغاثہ کی غیر موجودگی میں خصوصی سرکاری وکیل اویناس رسال نے مقدمہ کی سماعت ملتوی کیئے جانے کی گذارش کی جس پر خصوصی جج اے کے لاہوٹی نے گواہ استغاثہ کے خلاف قابل ضمانت وارنٹ جاری کرتے ہوئے معاملے کی سماعت ملتوی کردی۔دوان سماعت آج عدالت میں ملزم سمیرکلکرنی، کرنل پروہت موجود تھے کہ جبکہ بم دھماکہ متاثرین کو قانونی امداد فراہم کرنے والی تنظیم جمعیۃ علماء مہاراشٹر (ارشد مدنی) کی جانب سے ایڈوکیٹ شاہد ندیم موجود تھے۔دوران سماعت عدالت نے چیف تفتیشی افسر کو حکم دیا کہ وہ گواہوں کی حاضری کو یقینی بنانے کے لیئے اقدامات کریں ورنہ عدالت کو سخت فیصلہ لینا پڑے گا۔واضح رہے کہ ممبئی کی خصوصی این آئی اے عدالت ملزمین سادھوی پرگیہ سنگھ ٹھاکر، میجررمیش اپادھیائے، سمیر کلکرنی، اجئے راہیکر، کرنل پرساد پروہت، سدھاکر دھر دویدی اور سدھاکر چترویدی کے خلاف قائم مقدمہ میں گواہوں کے بیانات کا اندراج کررہی ہے، ابتک 271گواہوں کی گواہی عمل میں آچکی ہے اور عدالتی کارروائی روز بہ روز کی بنیاد پر جاری ہے۔