گورنر کرناٹک نے مذہب تبدیلی بل کو منظوری دے دی

بنگلورو۔ یکم؍اکتوبر: کرناٹک میں تبدیلی مذہب مخالف بل کو سرکاری طور پر نافذ کیا گیا کیونکہ کرناٹک کے گورنر تھاور چندا گہلوت نے 28 ستمبر کو بل کو منظوری دے دی۔ ریاستی حکومت نے اس سلسلے میں ریاستی گزٹ نوٹیفکیشن جاری کیا ہے۔ ‘کرناٹک پروٹیکشن آف رائٹ ٹو فریڈم آف ریلیجن بل گزشتہ ڈسمبر میں قانون ساز اسمبلی نے پاس کیا تھا۔ چونکہ یہ بل قانون ساز کونسل میں پاس ہونے کے لیے زیر التوا تھا، جہاں حکمران بی جے پی کے پاس اس وقت اکثریت نہیں تھی، اس کے بعد حکومت نے اس بل کو نافذ کرنے کے لیے اس سال مئی میں ایک آرڈیننس جاری کیا تھا۔وزیر داخلہ اراگا جانیندرا نے حال ہی میں ایوان بالا میں غور و خوض کے لیے بل پیش کیا۔ کرناٹک اسمبلی نے حال ہی میں کونسل کے اجلاس میں تبدیلی مخالف بل پاس کیا۔ کانگریس کی مخالفت کے باوجود بل منظور کر لیا گیا۔