اصلاحِ معاشرہ کے عنوان پر جمعیتہ علماء ضلع شمال مشرقی دھلی مزید محنت کرنے کے لئے پرعزم ۔

نئی دہلی /پریس ریلیز

جمعیتہ علماء ضلع شمال مشرقی دھلی کی اصلاحِ معاشرہ محنت پر صوبائی عاملہ میں عہدیداران کی طرف سے ضلعی جمعیتہ کی حوصلہ افزائی قابلِ مبارکباد ۔

جمعیتہ علماء ضلع شمال مشرقی دھلی آئندہ بھی مرکز اور صوبائی جمعیتہ کی طرف سے ملنے والے ہر تقاضہ کو پورا کریگی ۔ ان شاءاللہ

جمعیۃ علماء ھند (ضلع شمال مشرقی دہلی) کی مجلسِ عاملہ بمقام دفتر مدرسہ زینت القرآن ویلکم بوقت گیارہ بجے صبح منعقد ہوئی ، جسکی صدارت جناب الحاج محمد سلیم رحمانی (صدر جمعیۃ علماء ضلع) نے فرمائی جبکہ نظامت کے فرائض مولانا جمیل اختر قاسمی (ناظم ضلع) نے انجام دئیے ۔

پروگرام کا آغاز مولانا شمیم عادل قاسمی (ناظم حلقہ وزیر آباد) کی تلاوتِ قرآن کریم اور مفتی سید محمد اسلم قاسمی (خازن ضلع) کی نعت پاک سے ہوا۔

مولانا جمیل اختر قاسمی نے میٹنگ کے اغراض و مقاصد پر روشنی ڈالتے ہوئے کہا کہ مرکز اور صوبائی جمعیتہ کی طرف سے ملنے والا تقاضہ یعنی اصلاح معاشرہ مہم پر ہمارے ضلع میں اور ضلع کے اکثر حلقوں میں ابھی تک محنت جاری وساری ہے ، مسجد مسجد اصلاحِ معاشرہ کے پروگرام منعقد ہورہے ہیں ، اور مسجد وار اصلاحِ معاشرہ کمیٹی تشکیل دی جارہی ہیں ، جس کی پزیرائی گزشتہ دنوں منعقدہ صوبائی مجلسِ عاملہ میں صوبائی عہدیداران کی جانب سے بھی کی گئی ہے بلکہ مجلس میں یہ بھی کہا گیا کہ ضلع شمال مشرقی دھلی اپنی کارکردگی کے اعتبار سے پورے صوبہ میں پہلے نمبر پر ہے ، جو کہ ہمارے ضلع کے لئے فخر کی بات ہے ، اس میں تمام ضلعی ذمہ داران اور حلقہ جات کے عہدیداران و ارکان و محبان جمعیۃ کی محنتیں شامل ہیں کہ وہ اپنے اپنے اعتبار سے محنتیں کررہے ہیں ، امید ہے کہ آگے بھی اس مہم کو تسلسل کیساتھ اپنے اپنے طور پر جملہ حلقہ جات میں جاری رکھیں گے ۔ ان شاءاللہ تعالیٰ

مولانا جمیل اختر قاسمی نے مزید کہا کہ جمعیتہ علماء ضلع شمال مشرقی دھلی آئندہ بھی مرکز یا صوبہ کی طرف سے ملنے والے ہر تقاضہ کو حتی المقدور پورا کرنے کی کوشش کریگی ۔ان شاءاللہ

صدر صاحب کی یاددہانی پر ناظم مجلس نے شوال المکرم میں منعقد ہونے والے صوبائی منتظمہ اجلاس کی تیاری کے لئے بھرپور کوشش کرنے اور تعاون کے اعتبار سے جو تقاضہ ملا ہے اسکو فروری کے آخر تک پورا کرنے کی بات کہی ۔

ضلع خازن جناب مفتی سید محمد اسلم قاسمی نے موجودہ ٹرم کا اب تک کا حساب و کتاب بڑے ہی اچھے انداز میں پیش کیا جسمیں آمد و خرچ کی تمام تر تفصیلات سامنے آئیں ۔

آخر میں مفتی مطیع الرحمان قاسمی (صدر جمعیۃ علماء حلقہ چاند باغ) کی دعا پر مجلس عاملہ اختتام پذیر ہوئی۔

اہم شرکائے مجلس میں مفتی محمد دلشاد قاسمی (نائب ناظم ضلع) مفتی مجاھد حسن قاسمی (صدر حلقہ وزیر آباد) مولانا محمد انور قاسمی (صدر حلقہ گوکل پوری) مولانا محمد ھارون قاسمی (صدر حلقہ کھجوری) قاری محمد انیس قاسمی (ناظم حلقہ کھجوری) مفتی نسیم احمد قاسمی (صدر حلقہ منڈولی) مفتی محمد عامر قاسمی نائب ناظم حلقہ مصطفیٰ آباد) مفتی شان عالم قاسمی (رکن جمعیتہ علماء حلقہ مصطفیٰ آباد) قاری محمد فرید (رکن جمعیتہ علماء حلقہ ویلکم) مفتی مظفر حسین جامعی (ناظم حلقہ سیماپوری) قاری خورشید عالم فرقانوی (نائب ناظم ضلع) وغیرہ کے نام قابلِ ذکر ہیں ۔