کرناٹک :کون بنے گاوزیراعلیٰ ؟ دہلی میں کانگریس صدرکے گھرپرمیٹنگوں کادورجاری، راہل گاندھی بھی موجود

ہندوستان

نئی دہلی(ایجنسی) کرناٹک کے سی ایم کو لے کر کانگریس میں منتھن جاری ہے۔ وزیر اعلیٰ کے عہدے کے دونوں امیدوار دہلی میں ہیں۔ کانگریس صدر ملکارجن کھرگے کے گھر پر ایک اہم میٹنگ بھی ہوئی، جس میں راہل گاندھی اور کے سی وینوگوپال نے شرکت کی۔اب دیکھنا یہ ہے کہ کانگریس کس فارمولے پر آگے بڑھے گی۔ ڈھائی سال کے لیے وزیراعلیٰ کا فارمولا ہوگا یا ایک وزیراعلیٰ اور ایک ڈپٹی وزیراعلیٰ ہوگا۔ اس دوران کرناٹک کانگریس کے صدر ڈی کے شیوکمار بھی دہلی پہنچ گئے ہیں۔ وہیں سابق وزیر اعلیٰ سدارامیا کل سے دہلی میں ہیں۔ آج پارٹی صدر کھرگے اور سونیا گاندھی کی ملاقات کے بعد کسی کے نام پر حتمی مہر لگنے کا امکان ہے۔

دوسری جانب سی ایم کے عہدے کے مضبوط دعویدار ڈی کے۔ شیوکمار نے دہلی روانہ ہونے سے پہلے کہا کہ وہ کوئی عہدہ حاصل کرنے کے لیے نہ تو پارٹی کو دھوکہ دیں گے اور نہ ہی پارٹی کو بلیک میل کریں گے۔ انہوں نے کہا، "اب ہمارا اگلا ہدف (لوک سبھا انتخابات میں) 20 سیٹیں جیتنا ہے۔ ہماری پارٹی متحد ہے، اور میں کسی کو تقسیم نہیں کرنا چاہتا۔ میں ایک ذمہ دار آدمی ہوں۔ میں نہ تو پارٹی کو دھوکہ دوں گا اور نہ ہی بلیک میل کروں گا۔ ’’ انہوں نے یہ بھی کہا کہ آج وہ جہاں بھی ہیں، کانگریس کی وجہ سے ہیں۔ ڈی کے نے کہا، "یہ پارٹی (کانگریس) ہم نے بنائی ہے، یہ گھر ہم نے بنایا ہے۔ میں اس کا حصہ ہوں، ایک ماں اپنے بچے کو سب کچھ دے گی۔”
اس سے قبل، اتوار کو کانگریس لیجسلیچر پارٹی کی میٹنگ میں، ایک متفقہ قرارداد منظور کی گئی جس میں پارٹی صدر کھرگے کو کرناٹک کے وزیر اعلیٰ کا نام منتخب کرنے کا اختیار دیا گیا۔ کانگریس، جس نے 10 مئی کو کرناٹک اسمبلی انتخابات کے نتائج میں بھارتیہ جنتا پارٹی (بی جے پی) کو شکست دے کر زبردست جیت درج کی تھی، وزیر اعلی کے انتخاب پر غور کر رہی ہے۔ اس میں کانگریس نے 135 سیٹیں جیتی ہیں۔ اس کے ساتھ ہی اس بار بی جے پی صرف 66 سیٹوں پر سمٹ گئی۔

Comments are closed.