میں وزیر اعظم کے عہدے کا دعویدار نہیں ، صرف اپوزیشن کو متحد کرنے کی کوشش کر رہاہوں:شردپوار

ممبئی(ایجنسی)نیشنلسٹ کانگریس پارٹی کے سربراہ شرد پوار نے پیر کو کہا کہ میں صرف اپوزیشن جماعتوں کو متحد کرنے کی کوشش کر رہا ہوں۔ میں وزیر اعظم بننے کی دوڑ میں نہیں ہوں کیونکہ میں اگلالوک سبھا الیکشن نہیں لڑوں گا۔ میں چاہتا ہوں کہ اپوزیشن کو ایسی قیادت ملے، جو ملک کی بہتری کے لیے کام کرے۔
این سی پی سربراہ نے کہا کہ بہار کے وزیر اعلیٰ نتیش کمار بھی آئندہ لوک سبھا انتخابات کے لیے اپوزیشن کو مضبوط کرنے کی کوشش کر رہے ہیں۔ وہ پونے یونیورسٹی کے وائس چانسلر رام تاکاوالے کے انتقال پر منعقدہ تعزیتی اجلاس میں شرکت کے لیے آئے تھے۔
شرد پوار نے کرناٹک اسمبلی انتخابات میں کانگریس کی جیت پر راہل گاندھی کی تعریف کی۔ انہوں نے کہا کہ کرناٹک کے انتخابی نتائج راہل گاندھی کی بھارت جوڑو یاترا کی کامیابی کی بہترین مثال ہیں۔ لوگ ان کے بارے میں جو بھی کہیں، لیکن مجھے یقین ہے کہ لوگ راہول گاندھی کے نظریے کو مضبوط کریں گے۔
پیر کو جب این سی پی سربراہ جینت پاٹل سے ای ڈی کی پوچھ گچھ پر سوالات پوچھے گئے تو انہوں نے کہا کہ حکومت ایجنسیوں کا غلط استعمال کر رہی ہے۔ حکومت مرکزی ایجنسیوں کے ذریعے اپوزیشن لیڈروں کو پریشان کر رہی ہے۔ بی جے پی این سی پی لیڈروں کو ہراساں کرکے کچھ حاصل کرنا چاہتی ہے، لیکن ہم انہیں مطمئن کرنے والے نہیں ہیں۔
کانگریس اور شیو سینا کے ساتھ سیٹوں کی تقسیم پر، جو مہا وکاس اگھاڑی کا حصہ ہیں، انہوں نے کہا کہ حال ہی میں میری رہائش گاہ پر ایک میٹنگ ہوئی تھی۔ ایم وی اے قائدین اس بارے میں فیصلہ کریں گے۔ ادھو ٹھاکرے، سونیا گاندھی یا کانگریس کے سربراہ ملکارجن کھرگے اور میں اس کے بارے میں ملاقات کریں گے اور بات کریں گے۔ بتا دیں کہ مئی 2024 کے آس پاس ملک میں لوک سبھا انتخابات ہونے والے ہیں۔ جس کے فوراً بعد مہاراشٹر میں اسمبلی انتخابات ہوں گے۔