سعودی عرب: انڈیا میں نئے ویزا مراکز کھولنے اور زائرین کے لیے سستی پروازیں شروع کرنے کا اعلان

بصیرت نیوزڈیسک
سعودی وزیر حج اور عمرہ توفیق الربیعہ نے کہا ہے کہ سعودی عرب انڈیا میں نئے ویزا مراکز کھولے گا اور عمرہ کے سفر میں انڈین زائرین کی بڑھتی ہوئی تعداد کو سہولت فراہم کرنے کے لیے سستی پروازیں متعارف کرائے گا۔
عرب نیوز کے مطابق سعودی وزیر حج اور عمرہ ایک سرکاری دورے پر نئی دہلی میں ہیں جس کا مقصد انڈین حکام اور شراکت داروں کے ساتھ تعاون کو مضبوط کرنا اور بین الاقوامی زائرین کے لیے عمرہ کی زیارت کو ہموار کرنا ہے۔
سعودی وزیر حج اور عمرہ نے دہلی میں ایک مشترکہ پریس کانفرنس کے دوران کہا کہ ویژن 2030 کے اصلاحاتی منصوبے کے ایک حصے کے طور پر، مملکت نے دنیا بھر کے مسلمانوں کے لیے ’عمرہ کو ایک فائدہ مند مذہبی مہم میں تبدیل کرنے‘ کے لیے تکنیکی ترقی، بہتر اقدامات، اور بنیادی ڈھانچے کو اپ گریڈ کیا ہے۔
انڈیا میں 20 کروڑ سے زیادہ مسلمان ہیں، جو کسی ملک میں دنیا کی سب سے بڑی مسلم اقلیتی آبادی ہے۔
2023 میں انڈیا سے عمرہ زائرین کی تعداد میں گذشتہ سال کے مقابلے میں تقریباً 74 فیصد اضافہ ہوا اور زائرین کی تعداد 12 لاکھ سے زائد تھی۔
سعودی وزیر کا کہنا تھا کہ یہ اضافہ سعودی عرب اور انڈیا کی مشترکہ کوششوں کا نتیجہ تھا۔ مزید کہا کہ دونوں ممالک نے اپنے درمیان براہ راست پروازیں بڑھانے کے لیے بات چیت شروع کی ہے تاکہ ’عمرہ کرنے کے خواہشمند انڈینز کی بڑھتی ہوئی تعداد کو ایڈجسٹ کیا جا سکے۔‘
انہوں نے کہا کہ ’ہم سعودی کم لاگت والی ایئر لائنز، فلائی ناس اور فلائیڈیل کے ذریعے نئی شیڈول پروازیں متعارف کروا کر متوقع اضافے کو پورا کرنے کی صلاحیت کو بڑھانے پر بھی توجہ مرکوز کر رہے ہیں۔‘
’ان کوششوں کو ویزا جاری کرنے کے طریقہ کار کو ہموار کرنے اور انڈیا میں تین نئے ویزا مراکز قائم کرنے کے اقدامات سے مکمل کیا گیا ہے۔‘