دہشت گردی کسی مہذب سماج میں برداشت نہیں کی جا سکتی: مولانا محمد شبلی قاسمی

نورچک، بسفی (مدھوبنی) 24اپریل

پہلگام، کشمیر میں سیاحوں پر حالیہ دہشت گردانہ حملے کی شدید مذمت کرتے ہوئے مولانا محمد شبلی قاسمی، ناظم امارتِ شرعیہ بہار، اڈیشہ و جھارکھنڈ نے کہا کہ معصوم اور بے گناہ افراد پر حملہ بزدلانہ حرکت ہے جو کسی بھی صورت میں قابلِ قبول نہیں،وہ آج نورچک میں مقامی صحافیوں سے گفتگو کر رہے تھے۔

انہوں نے کہا کہ جو عناصر اس طرح کے حملے کرتے ہیں، ان کا نہ کوئی مذہب ہوتا ہے نہ ضمیر۔ ایسے عناصر دراصل ملک کے امن، یکجہتی اور بھائی چارے کو تباہ کرنا چاہتے ہیں۔ ہم سب کو مل کر ان کے خلاف آواز بلند کرنی چاہیے۔

مولانا شبلی قاسمی نے متاثرہ خاندانوں سے دلی تعزیت اور زخمیوں کے لیے شفایابی کی دعا کرتے ہوئے کہا کہ پورا ملک ان کے ساتھ ہے۔ انہوں نے حکومت سے مطالبہ کیا کہ مجرموں کو فوری طور پر کیفر کردار تک پہنچایا جائے اور ایسے واقعات کی روک تھام کے لیے سیکورٹی نظام کو مزید مؤثر بنایا جائے۔انہوں نے کہاکہ پہلگام میں بے گناہوں کے قتل عام پہ حضرت امیر شریعت مولانا انیس الرحمن قاسمی اپنے شدید دکھ کا اظہار کرتے ہوئے کہاکہ بے قصور انسانوں کا قتل انتہائی وحشیانہ عمل ہے۔انہوں نے حکومت سے اپیل کی کہ اس واقعہ کی جانچ کرکے اس کارروائی کے پیچھے جو بھی طاقتیں ہیں، ان کے خلاف سخت کارروائی کی جائے اور مجرمین کے ساتھ کسی بھی طرح کی نرمی نہ برتی جائے ؛بلکہ انہیں ایسی عبرتناک سزا دی جائے جو پورے ملک کے لیے مثال ہو اور آئندہ کوئی بھی معصوم جانوں کے ساتھ کھلواڑ کرنے کی ہمت نہ کر سکے ۔انہوں نے ریاستی اور مرکزی حکومت سے علاقہ میں امن و امان کی فضا ہموار کرنے اور شہریوں کے تحفظ کو یقینی بنانے کا مطالبہ کیا ۔انہوں نے کہا کہ اتنا بڑا واقعہ رونما کیسے ہوا ، سیکورٹی میں کیا چوک ہوئی ، اس کی بھی جانچ کرنے اور سیکورٹی کے نظام کو مزید مضبوط بنانے کی ضرورت ہے۔