مرکزعلم ودانش علی گڑھ مسلم یونیورسٹی کی تعلیمی وثقافتی سرگرمیوں کی اہم خبریں

 

اے ایم یو گیس ایجنسی کو انڈین آئل کارپوریشن کی جانب سے اعزاز

 

علی گڑھ، 8/اگست: انڈین آئل کارپوریشن لمیٹڈ نے علی گڑھ مسلم یونیورسٹی کی گیس ایجنسی کی اعلیٰ کارکردگی کو سراہتے ہوئے ایک اعزازی تقریب میں ادارے کو خراجِ تحسین پیش کیا۔ یہ گیس ایجنسی تقریباً 9,000 صارفین کو گیس فراہم کرتی ہے، جن میں اساتذہ اور غیر تدریسی عملہ، نیز پنشن یافتگان شامل ہیں۔

 

اس موقع پر آئی او سی ایل کے جنرل منیجر جناب شِوم سنگھل نے اے ایم یو کی وائس چانسلر پروفیسر نعیمہ خاتون اور پرو وائس چانسلر پروفیسر محمد محسن خان کو سالانہ کارکردگی رپورٹ پیش کی۔ انہوں نے بتایا کہ اے ایم یو گیس ایجنسی نے پانچوں معیارات—ڈِلیوری آتھنٹیکیشن کوڈ، پری ڈِلیوری چیک، صارف کی رائے، ای-کے وائی سی، اور ڈیجیٹل بکنگ میں پورے نمبر حاصل کیے۔

 

جناب سنگھل نے ایجنسی کی صارفین کے ساتھ وابستگی، حفاظتی اصولوں پر عمل، اور بروقت خدمات کی فراہمی کو سراہا اور کہا کہ یہ ایجنسی دیگر اداروں کے لیے ایک مثال بن گئی ہے۔ انہوں نے وائس چانسلر، پروفیسر نعیمہ خاتون، رجسٹرار مسٹر محمد عمران آئی پی ایس اور گیس ایجنسی کے ممبر انچارج پروفیسر ریاض احمد کو یادگاری نشان بھی پیش کیے۔

 

پروفیسر نعیمہ خاتون نے پروفیسر ریاض احمد اور اسسٹنٹ انچارج محمد کاشف کی خدمات کو سراہا اور انہیں مبارکباد دی۔ پرو وائس چانسلر پروفیسر محسن خان نے بھی ایجنسی کی مؤثر کارکردگی کی تعریف کی۔ اس موقع پر پروفیسر وِبھا شرما (ممبر انچارج، رابطہ عامہ) بھی موجود تھیں۔ پروفیسر ریاض احمد نے یونیورسٹی انتظامیہ اور آئی او سی ایل کا مسلسل تعاون کے لیے شکریہ ادا کیا۔

 

٭٭٭٭٭٭

 

جے این ایم سی میں عالمی ہفتہ برائے شیرِ مادر کی اہمیت پر بیداری پروگرام منعقد

 

علی گڑھ، 8/اگست: علی گڑھ مسلم یونیورسٹی کے جواہر لعل نہرو میڈیکل کالج کے کمیونٹی میڈیسن شعبہ کے زیر اہتمام عالمی ہفتہ برائے شیرِ مادر کی اہمیت کو واضح کرتے ہوئے کئی تعلیمی اور سماجی بیداری کی سرگرمیاں انجام دیں۔ پروگرام کی قیادت شعبہ کی صدر پروفیسر عظمیٰ ارم اور اربن ہیلتھ ٹریننگ سینٹر کے انچارج ڈاکٹر علی جعفر عابدی نے کی۔ اس سال کا موضوع تھا: ”ماں کے دودھ کو ترجیح دیں: پائیدار حمایت کو یقینی بنائیں ”۔

 

اس موقع پر فوکس گروپ مباحثے، صحت سے متعلق گفتگو، تخلیقی مقابلے، کمیونٹی سے رابطے اور تربیتی سیشنز کا انعقاد کیا گیا۔ ڈاکٹروں کی ایک ٹیم، جن میں ڈاکٹر ارم عابد، ڈاکٹر صبوحی افضال، ڈاکٹر الفاتح، ڈاکٹر علمہ قریشی، ڈاکٹر سوریا، ڈاکٹر ریّا، ڈاکٹر عرفی، ڈاکٹر چیلسی، ڈاکٹر عامر، اور ڈاکٹر سری لکشمی شامل تھے، نے مختلف مقامات پر بیداری مہم میں حصہ لیا، جن میں یو ایچ ٹی سی، اربن ہیلتھ پوسٹ، آنگن واڑی مراکز اور پنجی پور گاؤں شامل ہیں۔

 

تقریبات میں ماؤں اور نگرانوں کے ساتھ تبادلہ خیال، ماں کے دودھ سے متعلق سائنسی معلومات، اور دودھ پلانے کے صحیح طریقوں کا عملی مظاہرہ شامل تھا۔ انٹرن ڈاکٹروں کے پوسٹر مقابلے میں ڈاکٹر عفت سبرین اور ڈاکٹر ہنسیکا سکسینہ نے پہلی پوزیشن حاصل کی جبکہ ڈاکٹر فواز تابش اور ڈاکٹر امتیاز انصاری دوسرے نمبر پر رہے۔ ججوں میں پروفیسر عظمیٰ ارم اور ڈاکٹر صبوحی افضال شامل تھیں۔

 

ایک اسٹیج ڈرامے میں دودھ پلانے سے متعلق مفروضات اور حقائق پر روشنی ڈالی گئی۔ تین ایسی ماؤں کو اعزاز دیا گیا جنہوں نے مکمل طور پر بچوں کو اپنا دودھ پلایا۔ آشا، اے این ایم اور آنگن واڑی ورکرز کے لیے تربیتی سیشن بھی منعقد کیا گیا۔

 

بعد میں، شیرِ مادر ہفتہ ایک اختتامی تقریب کے ساتھ ختم ہوا جس میں پروفیسر عظمیٰ ارم، پروفیسراطہر انصاری، ڈاکٹر علی جعفر عابدی، ڈاکٹر عرفی، اور ڈاکٹر صبوحی افضال شریک ہوئے۔ ڈاکٹر چیلسی نے اظہارِ تشکر کیا۔

 

٭٭٭٭٭٭

 

بصارت سے محروم افراد کے احمدی اسکول میں منشیات سے پاک مہم کے تحت ہفتہ بھر کی سرگرمیاں منعقد

 

علی گڑھ، 8/اگست: ”نشہ مکت بھارت ابھیان” کے تحت ”2047 تک منشیات سے پاک بھارت“ کے قومی مشن کو مدنظر رکھتے ہوئے، علی گڑھ مسلم یونیورسٹی کے احمدی اسکول کے طلبہ نے ”مشن ڈرگ فری کیمپس” کے عنوان سے ایک ہفتہ طویل بیداری مہم کا انعقاد کیا۔

 

مہم کی شروعات خصوصی اسمبلی اجلاس سے ہوئی، جس میں فزکس کی ٹیچر اور اسمبلی انچارج محترمہ ندرت جہاں نے طلبہ کو منشیات کے جسم، ذہن، تعلیم، خاندان اور معاشرے پر مضر اثرات سے آگاہ کیا۔

 

پرنسپل ڈاکٹر نائلہ راشد، اساتذہ اور طلبہ نے مل کر نشہ سے پاک بھارت کا حلف لیا۔ کمپیوٹر ٹیچر محترمہ ثنا شمشاد نے منشیات کے نقصانات پر مبنی ویڈیوز اور حقیقی واقعات سنائے، اور حکومت کے انسداد منشیات اقدامات سے بھی روشناس کرایا۔

 

مہم کی خاص بات اسکول کیمپس میں منعقدہ بیداری ریلی رہی، جس میں طلبہ نے پوسٹر اٹھا کر اور نعرے لگا کر نشہ سے پاک زندگی کا پیغام دیا۔ یہ مہم طلبہ پر مثبت اثر ڈالنے میں کامیاب رہی اور اسکول کے عزم کو ظاہر کیا کہ وہ ایک صحت مند اور منشیات سے پاک ماحول کے لیے سرگرم ہے۔

 

٭٭٭٭٭٭

 

اے ایم یو ویمنز پالی ٹیکنک میں اقوام متحدہ @ 80 ڈاک ٹکٹ ڈیزائن چیلنج کا انعقاد

 

علی گڑھ، 8/اگست: علی گڑھ مسلم یونیورسٹی کے ویمنز پالی ٹیکنک نے اقوام متحدہ کی 80ویں سالگرہ کے موقع پر ڈاک ٹکٹ ڈیزائن چیلنج کی یونیورسٹی سطح پر کامیاب میزبانی کی۔ یہ مقابلہ MyGov، محکمہ ڈاک اور وزارتِ خارجہ (اقوام متحدہ سیاسی شعبہ) کے تحت منعقد ہوا۔

 

پرنسپل ڈاکٹر سلمیٰ شاہین نے طالبات کو اس قومی اہمیت کے مقابلے میں تخلیقی انداز سے حصہ لینے کے لیے سراہا اور ان سے کہا کہ وہ ”اقوام متحدہ @ 80اور کثیرالطرفہ قیادت میں ہندوستان کا کردار” جیسے موضوعات کو اجاگر کریں۔

 

کل 17 طالبات نے مقابلے میں حصہ لیا اور اپنی تخلیقات پیش کیں۔ ڈیزائنز کو فنی معیار، موضوع سے مطابقت اور پیشکش کی بنیاد پر جانچا گیا۔ ججوں کے پینل میں ڈاکٹر سویتا گوتم، ڈاکٹر محمد عامر بیگ اور محترمہ اقرا سلیم شامل تھیں۔ چھ بہترین ڈیزائنز کو منتخب کیا گیا۔ پروگرام کی نظامت محترمہ سعدیہ نعیم اور محترمہ نازیہ حنیف نے کی۔

 

٭٭٭٭٭٭

 

اے ایم یو میں آر سی اے داخلہ امتحانات کی نئی تاریخوں کا اعلان

 

علی گڑھ، 8/اگست: علی گڑھ مسلم یونیورسٹی کی ریزیڈنشل کوچنگ اکیڈمی (آر سی اے)، نے سول سروسز، عدالتی سروسز اور ایس ایس سی-سی جی ایل کوچنگ پروگراموں کے داخلہ امتحانات کے لیے نیا شیڈول جاری کیا ہے۔ یہ فیصلہ یو پی ایس ایس ایس سی (پی ای ٹی) امتحان (7 ستمبر 2025) اور چھتیس گڑھ عدالتی امتحان (21 ستمبر 2025) سے تاریخوں کے ٹکراؤ کے باعث لیا گیا۔

 

نئے شیڈول کے مطابق، سول سروسز کوچنگ پروگرام کے لیے داخلہ امتحان اب 21 ستمبر 2025 کو صبح 10بجے سے دوپہر 1 بجے تک منعقد ہوگا۔ ایس ایس سی-سی جی ایل کوچنگ پروگرام کا امتحان بھی اسی دن سہ پہر 3 بجے سے 5 بجے تک لیا جائے گا۔ عدالتی خدمات کوچنگ پروگرام کا امتحان 25 ستمبر 2025 کو سہ پہر 3 بجے سے 5 بجے تک منعقد کیا جائے گا۔

داخلے کے خواہشمند امیدوار نئی تاریخوں اور وقت کو ذہن میں رکھتے ہوئے اپنی تیاری جاری رکھیں۔