بہارانتخابات:راہل گاندھی 29؍اکتوبرکوکریں گے بہارمیں پہلی انتخابی ریلی،مظفرپوراوردربھنگہ سے کریں گے آغاز،تیجسوی بھی رہیں گے موجود

پٹنہ(ایجنسی)کانگریس لیڈر راہل گاندھی 29 اکتوبر کو بہار میں تیجسوی یادو کے ساتھ اپنی پہلی مشترکہ ریلی کریں گے۔ یہ ریلیاں مظفر پور اور دربھنگہ میں نکالی جائیں گی۔ بہار اسمبلی انتخابات میں کانگریس کے رکن پارلیمنٹ راہل گاندھی کی یہ پہلی انتخابی ریلیاں ہوں گی۔ جبکہ این ڈی اے نے بہار انتخابات سے راہل گاندھی کی طویل غیر حاضری پر سوال اٹھایا ہے۔
کانگریس کے سابق صدر راہل گاندھی 29 اکتوبر کو بہار اسمبلی انتخابات کے لیے اپنی مہم شروع کریں گے۔ وہ مظفر پور کے سکرا اسمبلی حلقہ اور دربھنگہ میں مہاگٹھ بندھن کے امیدواروں کی حمایت میں دو مشترکہ عوامی ریلیوں سے خطاب کریں گے۔ ان ریلیوں میں بہار اسمبلی میں اپوزیشن لیڈر اور مہاگٹھ بندھن کے وزیر اعلیٰ کے امیدوار تیجسوی یادو بھی موجود رہیں گے۔
بہار پردیش کانگریس کمیٹی کے میڈیا ڈیپارٹمنٹ کے سربراہ راجیش راٹھور کے مطابق اسمبلی انتخابات کے پیش نظر راہل گاندھی کا بہار کا یہ پہلا دورہ ہے۔ راہل گاندھی سکرا (ریزرو) سیٹ سے مہاگٹھ بندھن کے امیدوار امیش رام کی حمایت میں اپنی پہلی ریلی سے خطاب کریں گے۔ اس کے بعد وہ دربھنگہ میں دیگر مہاگٹھ بندھن امیدواروں بشمول آر جے ڈی کے امیدواروں کے لیے ریلیوں سے خطاب کریں گے۔
راجیش راٹھور نے کہا کہ اس سے پہلے راہل گاندھی نے لگاتار 16 دنوں تک بہار کے مختلف علاقوں میں 1300 کلومیٹر کا سفر کیا تھا۔ اپنے سفر کے بعد انتخابی میدان میں یہ ان کا پہلا بڑا مشترکہ جلسہ ہوگا، جہاں وہ مہاگٹھ بندھن کی انتخابی حکمت عملی اور عوام کے مسائل کو بھرپور طریقے سے اٹھائیں گے۔
حال ہی میں راہل گاندھی نے تہوار کے موسم میںناقص ٹرین انتظامات کے لیے مرکزی حکومت پر تنقید کی تھی۔ انہوں نے خاص طور پر چھٹھ پوجا کے لیے بہار جانے والے تارکین وطن مزدوروں کو درپیش مشکلات پر روشنی ڈالی۔ زیادہ بھیڑ کا ذکر کرتے ہوئے، انہوں نے کہا کہ کچھ ٹرینیں 200 فیصد صلاحیت سے چل رہی ہیں۔ راہل گاندھی نے این ڈی اے حکومت سے تہوار کے بھیڑ کو سنبھالنے کے لیے 12,000 خصوصی ٹرینیں چلانے کے وعدے کے بارے میں بھی سوال کیا۔
انسٹاگرام پر ایک پوسٹ میں راہل گاندھی نے لکھا، ’’یہ تہواروں کا مہینہ ہے۔ دیوالی، بھائی دوج، چھٹھ، بہار میں، یہ تہوار عقیدت سےکہیں بڑھ کر ہیں؛ یہ گھر جانےکی خواہش کے بارے میں ہیں؛ مٹی کی خوشبو، خاندان کی محبت، گاؤں کی گرمجوشی۔ لیکن یہ خواہش اب ایک جدوجہد بن گئی ہے۔ بہار میں ٹرینیںکھچاکھچ بھری ہوئی جارہی ہیں، ٹکٹس ملنادشوارہوچکاہے، غیرانسانی طریقوںسے سفرکرناپڑرہاہے۔ بہت سی ٹرینیں 200 فیصد کی گنجائش سے چل رہی ہیں لوگ دروازوں اور چھتوں سے بھی لٹک کرجارہے ہیں۔ این ڈی اے حکومت پر نشانہ لگاتے ہوئے کانگریس لیڈر نے کہا کہ یہ لوگ بے بس مسافر نہیں ہیں بلکہ این ڈی اے کی فریب کارانہ پالیسیوں اور جھوٹےوعدوں کا زندہ ثبوت ہیں۔‘‘