بہار بورڈ کے ماڈل پیپر 2026 طلبا کے لیے رہنمائی کا مستحکم ذریعہ: امجد علی

امجد کلاسیز دوگھرا کے ڈائریکٹر نے تیاری میں ماڈل پیپر کے مسلسل استعمال پر دیا زور

جالے(رفیع ساگر) بہار اسکول اگزامینیشن بورڈ کی جانب سے میٹرک و انٹر امتحان 2026 کے لیے جاری کردہ ماڈل پیپرس کو طلبا کی کامیابی میں انتہائی اہم قرار دیتے ہوئے امجد کلاسیز دوگھرا کے ڈائریکٹر امجد علی نے کہا ہے کہ یہ ماڈل پیپر نہ صرف امتحانی پیٹرن کو سمجھنے کا بہترین ذریعہ ہیں بلکہ اچھے نمبرات کے حصول تک پہنچانے والی مضبوط سیڑھی بھی ثابت ہوتے ہیں۔ جمعرات کو جاری اپنے پریس ریلیز میں انہوں نے کہا کہ کسی بھی امتحان کی بہتر تیاری اسی وقت ممکن ہے جب طالب علم اس کے پیٹرن، سوالات کی نوعیت، نمبرات کی تقسیم اور اہم موضوعات کو اچھی طرح سمجھ لے، اور یہ سہولت ماڈل پیپر بخوبی فراہم کرتے ہیں۔

انہوں نے کہا کہ طلبا کو چاہئے کہ بورڈ کی ویب سائٹ پر جاکر اپنے درجے کے ماڈل پیپر ڈاؤن لوڈ کریں اور انہیں اپنی روزانہ کی مشق کا حصہ بنائیں، کیونکہ یہ پرچے پوری طرح نصاب اور امتحانی ضروریات کو مدنظر رکھتے ہوئے تیار کیے گئے ہیں۔ ان کے مطابق ماڈل پیپر کے ساتھ مسلسل مشق بچوں کو ٹائم مینیجمنٹ سکھاتی ہے، پرچہ حل کرنے کی رفتار میں اضافہ کرتی ہے اور اس کے ساتھ ہی سوالات کو درستگی سے حل کرنے کی صلاحیت کو بھی نکھارتی ہے۔

امجد علی نے اپنے بیان میں بتایا کہ ماڈل پیپر کا مستقل مطالعہ طالب علم کی خود اعتمادی بڑھاتا ہے، کمزوریوں کی نشاندہی کرتا ہے اور خود تشخیص کے ذریعے بہتر تیاری میں مدد دیتا ہے۔ ساتھ ہی یہ ذہنی دباؤ کو کم کرکے اصل امتحان میں بہتر کارکردگی کے امکانات کو بڑھاتا ہے۔ انہوں نے والدین اور طلبا دونوں سے اپیل کی کہ وہ ماڈل پیپرز کی اہمیت کو سمجھیں اور انہیں امتحانی تیاری کا مرکزی حصہ بنائیں تاکہ روشن مستقبل کی طرف قدم مضبوطی سے بڑھایا جا سکے۔

انہوں نے یہ بھی کہا کہ ماڈل پیپر کا باقاعدہ استعمال امتحان کے خوف کو کم کرتا ہے اور سوالات کی ساخت کو سمجھنے میں مدد دیتا ہے، جس سے طلبا حقیقی امتحان کے لیے زیادہ پراعتماد اور تیار ہوجاتے ہیں۔ امجد علی کے مطابق جو طلبا وقت رہتے ماڈل پیپر کی مدد سے اپنی تیاری مکمل کر لیتے ہیں، وہ نہ صرف اچھے نمبر حاصل کرتے ہیں بلکہ مسابقتی امتحانات میں بھی نمایاں کامیابیاں درج کراتے ہیں۔

آخر میں انہوں نے کہا کہ کامیابی ان ہی طلبا کے قدم چومتی ہے جو منظم طریقے سے پڑھتے، بار بار مشق کرتے اور خود اپنی غلطیوں کی اصلاح کرتے ہیں۔ اسی لیے بورڈ کے جاری کردہ ماڈل پیپر ہر طالب علم کے لیے ایک لازمی دستاویز ہیں جن سے بھرپور استفادہ کیا جانا چاہیے۔