ننھی طالبات عنایہ اور مریم کی تکمیلِ قرآن، والدین و اساتذہ میں خوشی کی لہر

لکھنو: (رضا ابرار ندوی)

دینی تعلیم کے میدان میں ایک خوش آئند اور روح پرور خبر سامنے آئی ہے، جہاں ننھی طالبات “عنایہ” اور “مریم” نے بحمد اللہ قرآنِ کریم مکمل کر کے عظیم سعادت حاصل کرلی۔ اس موقع پر والدین، اساتذہ اور اہلِ علاقہ میں خوشی کی لہر دوڑ گئی۔

تفصیلات کے مطابق دونوں طالبات نے کم عمری میں نہایت شوق، محنت اور لگن کے ساتھ قرآنِ کریم کی تعلیم حاصل کی۔ دورانِ تعلیم انہوں نے سبق یاد کرنے، درست تلفظ اور روانی کے مراحل بڑی دلچسپی اور مستقل مزاجی سے طے کیے، جس کے نتیجے میں اللہ تعالیٰ نے انہیں تکمیلِ قرآن جیسی عظیم نعمت سے نوازا۔

استادِ محترم رضا ابرار ندوی نے اس موقع پر خوشی کا اظہار کرتے ہوئے کہا کہ بچوں کو قرآنِ کریم سے جوڑنا دراصل ایک بہترین اور روشن مستقبل کی بنیاد رکھنا ہے۔ انہوں نے کہا کہ قرآن صرف تلاوت کی کتاب نہیں بلکہ مکمل ضابطۂ حیات ہے، اور بچپن میں قرآن سے وابستگی انسان کی پوری زندگی کو سنوار دیتی ہے۔

انہوں نے مزید کہا کہ آج کے دور میں جبکہ موبائل اور دنیاوی مصروفیات بچوں کی توجہ کو مختلف سمتوں میں لے جا رہی ہیں، ایسے ماحول میں بچوں کا قرآنِ کریم کی طرف راغب ہونا انتہائی خوش آئند اور امید افزا بات ہے۔

اس موقع پر عنایہ اور مریم کے والدین کو بھی مبارک باد پیش کی گئی، جن کی خصوصی توجہ، دعاؤں اور دینی تربیت نے بچوں کو اس مقام تک پہنچانے میں اہم کردار ادا کیا۔

اہلِ علاقہ اور متعلقین نے دونوں طالبات کے روشن مستقبل کے لیے دعا کرتے ہوئے کہا کہ اللہ تعالیٰ انہیں قرآنِ کریم کا سچا خادم بنائے، علم و عمل کی دولت سے مالا مال فرمائے اور ہمیشہ قرآن کے نور سے ان کی زندگی کو منور رکھے۔ آمین۔