پیغام

(محمد سفیان قاسمی)
مہتمم دارالعلوم وقف دیوبند
کل گذشتہ کولمبو سری لنکا میں ہوئے انتہائی ہلاکت خیز دہشت گردانہ حملے میں دو سو سے زائد معصوم لوگوں کا جان سے ہاتھ دھونا اور اس کی دوگنی تعداد کے زخمی ہونے کا حادثہ انتہائی قابل مذمت اور صدمے کا باعث ہے۔ دنیا کے تمام مذاہب اور مذہبی شخصیات و مقتدائوں کا واجبی عزت و احترام اسلام کی اخلاقی تعلیمات کا بنیادی حصہ ہے۔ مذہبی مقامات و شخصیات اور معصوم لوگوں کو دہشت گردی کا نشانہ بنا کر تباہ و برباد کرنادہشت گردوں کے ذہنی دیوالیہ پن اور ہلاکت خیز جنونی کیفیت کی علامت ہے جس کا تعلق کسی بھی مذہب یا مذہبی تعلیمات سے نہیں ہوسکتا ہے۔خواہ انسانوں کے بھیس میں ایسی قابل نفرت و مذمت حرکت کو انجام دینے والے یا اس کی پشت پناہی کرنے والے درندہ صفت لوگ اپنی اصل شناخت کو چھپانے کے لئے کسی بھی قوم اور کسی بھی مذہب کے ماننے والے لوگوں کا لباس دھوکہ اور فریب نظر کے لئے کیوں نہ استعمال کرتے ہوں لیکن بلا تفریق مذہب وملت دنیا میں عقل و شعور رکھنے والے لوگوں کی اکثریت ایسی انسانیت سوز حرکت کو شدید نفرت کی نظر سے دیکھتی اور لائق مذمت سمجھتی ہے۔ کیتھولک مذہبی تقریب کے موقع پر ایک خاص سوچے سمجھے جنونی منصوبے کے تحت انجام دئیے جانے والے اس انتہائی افسوسناک قابل نفرت و مذمت حادثے اور اس شدید آزمائشی وقت میں مہلوکین کے ورثا سے تعزیت اور متأثرین سے دلی ہمدردی کا اظہار کرتے ہوئے دعاء کرتے ہیں کہ اللہ تعالیٰ امن و سکون اور عافیت عطاء فرمائیں، اسی کے ساتھ حکومت ہند سے خالص انسانی ہمدردی کی بنیاد پر مطالبہ کرتے ہیں کہ سری لنکا کی اس مشکل ترین گھڑی میں ہر ممکن دست تعاون دراز کرتے ہوئے متأثرین کو امداد بہم پہنچائی جائے۔

(بصیرت فیچرس)