مضبوط حکمت عملی کی ضرورت

زین شمسی

بھارت نے اپنی دشا اور دِشا طے کر لی ہے۔ اب ہم لوگوں کی باری ہے کہ ہم اپنی دشا اور دِشا طے کرتے ہیں یا نہیں۔ آپسی تنازعات و الزامات سے پرے ہٹ کر ہمیں یہ بات تسلیم کر لینی چاہٸے کہ ہم جس دِشا میں سوچ رہے تھے اس کا حلقہ بہت محدود تھا ۔ ہم سیکولرازم اور کامنلزم کی بنیاد پر بھارت کی قسمت تبدیل کرنے کاتصور لے کر میدان الیکشن میں تھے لیکن نتیجہ راشٹرواد کے نٸے فارمولہ کے تحت ہمارے سامنے آیا۔ راہل گاندھی کی شکست نے یہ ثابت کیا کہ بھارت کو ایک ایک ایسے ہیرو کی تلاش تھی جو فیصلہ لینے کا مادہ رکھتا ہو جو مودی کی شکل میں اسے مل چکا ہے۔

یوپی میں گٹھ بندھن کی ناکامی نے یہ بھی ثابت کر دیا کہ آر ایس ایس کو جس طرح مسلمان اپنا دشمن سمجھتے ہیں اس طرح دلت یادو اور جاٹ نہیں سمجھتے ان کے لٸے بی جے پی اچھوت نہیں رہی اس لٸے نیتاٸوں کے متحد ہو جانے کے باوجود ووٹرس منتشر ہی رہے۔

بہار نے دل کھول کر فقیر کی جھولی میں 39سیٹ کا زکوة فطرہ بھر دیا جو یہ ثابت کرنے کے لٸے کافی ہے کہ یادو کشواہا ساہنی مانجھی اور دیگر طبقے کے ووٹر بھی مودی کے کرشمہ سے کسی نہ کسی حد تک متاثر تھے اور آر جے ڈی کی نٸی قیادت کے اول جلول فیصلہ کو اندر ہی اندر مسترد کر چکے تھے۔

مودی اور شاہ نے جتنی مضبوطی کے ساتھ پورے ہندوستان کو جیتنے کا لاٸحہ عمل بنایاتھا اس میں یہ ممکن ہی نہیں تھا کہ پورا ہندوستان کنہیا کو پارلیمنٹ بھیج سکے ۔ نتیجہ نے یہ ظاہر کر دیا کہ تنویر حسن اور کنہیا کے ووٹوں کو ملا کر بھی گری راج سنگھ کو نہیں ہرایا جا سکتا تھا گویا اگر وہاں کا مقابلہ دورخی بھی ہوتا تب بھی جیت بی جے پی کی ہی ہوتی۔ پھربھی وہ لوگ مبارک باد کے مستحق ہیں جنہوں نے کنہیا کے لٸے دن رات ایک کر دیا۔ اخترالایمان کی شکست کے کیا معنی لٸے جاسکتے ہیں سواٸے اس کے کہ کشن گنج کے ووٹرس نہیں چاہتے کہ مسلمانوں کا یہ خطہ خالص مسلم قیادت کے بھنور میں پھنس کر بی جے پی کے سیدھے نشانے پر آ جاٸے اور ترقی تو دور کی بات ہے عدم تحفظ کا خطرہ بھی منڈلانے لگے۔

اگر بات ملک کے سیکولر ڈھانچہ ، ہم آہنگی بھاٸی چارگی اور بھارت کی ثقافت و تہذیب کو بچانے کی کی جاٸے تو داد کے مستحق ہیں مسلم ووٹرس کہ جنہوں نے اس مرتبہ نہایت دانشمندی اور اسٹریٹجی کے ساتھ ووٹنگ کی اور ایمانداری کے ساتھ بی جے پی کی مخالفت میں ووٹ کیا، دہلی کو چھوڑ دیں تو پورے بھارت میں مسلم ووٹروں میں پہلی مرتبہ بکھراٸو دیکھنے کو نہیں ملا لیکن افسوس کی بات یہ ہے کہ مسلمان جب تک سیاسی طور پر بیدار ہوتے ہندوستان کا تقریبا تمام طبقہ بی جے پی کے رنگ میں رنگ چکا تھا۔

اب یہی دَشا اور دِشا ہے جو مسلمانوں کو طے کرنا ہے کہ وہ آٸندہ کیا کریں گے۔ کیونکہ بی جے پی کی اس پرچنڈ جیت نے یہ دکھا دیا کہ بھارت میں موجود تمام طبقے ذات برادری میں اس نے سیندھ لگا دی ہے۔ اور یہ سیندھ راشٹر واد کے نام پر لگاٸی گٸی ہے۔ ورنہ سرکار کی اتنی ناقص کارکردگیوں کے باوجود اتنی بہترین جیت کا تصور محال ہے۔

سوچنا ہوگا۔بہت ہی گہراٸی کے ساتھ اور کچھ نہ کچھ کرنا ہوگا مضبوط حکمت عملی کے ساتھ۔