شہرِ سخن میں کیسے ملے ہم نَوا مجھے

غزل

شہرِ سخن میں کیسے ملے ہم نَوا مجھے
کیسی عداوتوں کا رہا سامنا مجھے

کوئی بھی رنگ دیکھ کے حیرت ہو کیا مجھے
بدلیں گے اپنا رنگ وہ معلوم تھا مجھے

دل مطمئن ہو آپ کی باتوں پہ کس طرح
پہنچا رہے ہیں آپ کہاں فائدہ مجھے

کانٹوں سے تیرے حوصلے ٹکرا گئے مرے
شاید نہ بھول پائے کبھی راستہ مجھے

تنہا دیا نہیں میں دیے کا ہوں سلسلہ
کم ظرف تیری پھونک بجھائے گی کیا مجھے

لینا تھا درگزر کی نگاہوں سے مجھ کو کام
رکھنا تھا ساتھ دیدۂ عبرت بھی وا مجھے

اندر سے چور چور تھا ہر ضرب پر تری
خوش دیکھنا تھا تجھ کو، بکھرنا پڑا مجھے

کس طرح چھوڑ دیتا اُگانا غزل درخت
رکھنا تھا دل کے زخم کو ہر دم ہرا مجھے

لکھتا تھا جن درختوں پہ اشکوں سے تیرا نام
دیتی ہیں اُن کی شاخیں ابھی تک دعا مجھے

ہر بار زخم دے کے وہ راغبؔ ہوا نہال
ہر بار اُس کو دیکھ کے اچھا لگا مجھے

افتخار راغبؔ
دوحہ قطر