سابق وزیر اعظم پاکستان تحریک انصاف کے چیئرمین عمران خان پانچ سال کے لیے نااہل قرار

آن لائن نیوز ڈیسک

پاکستانی الیکشن کمیشن نے سابق وزیر اعظم اور پاکستان تحریک انصاف کے رہنما عمران خان کو توشہ خانہ ریفرنس کیس میں اپنا متفقہ فیصلہ سناتے ہوئے جمعہ اکیس اکتوبر کے روز پانچ سال کے لیے عوامی نمائندگی کے لیے نااہل قرار دے دیا۔
کمیشن کے فیصلے کے مطابق عمران خان پر اپنے اثاثے چھپانے کا الزام بھی ثابت ہو گیا تھا۔ اس فیصلے کے بعد پہلے ہی مالیاتی اور اقتصادی بحران کے شکار اور حالیہ سیلابوں سے انتہائی بری طرح متاثر ہونے والے ملک پاکستان میں موجودہ سیاسی بے یقینی کی صورت حال میں شدت کا خدشہ پیدا ہو گیا ہے۔

عمران خان کے ترجمان فواد چوہدری نے اسلام آبا دمیں صحافیوں کو بتایا کہ الیکشن کمیشن نے پی ٹی آئی کے اس رہنما کے خلاف ریفرنس میں کافی عرصے سے التوا میں پڑا ہوا اپنا فیصلہ سناتے ہوئے انہیں نااہل قرار دے دیا ہے۔ ساتھ ہی عمران خان اب قومی اسمبلی کے رکن بھی نہیں رہے۔

فواد چوہدی نے اپنے بیان میں الیکشن کمیشن کے اس فیصلے کی مذمت بھی کی۔ عمران خان کو اسی سال موسم بہار میں متحدہ اپوزیشن نے ان کے خلاف پارلیمانی عدم اعتماد کی تحریک کے ذریعے اقتدار سے باہر کر دیا تھا۔

سابق وزیر اعظم خان کے وکیل گوہر خان نے بتایا کہ الیکشن کمیشن نے اپنے فیصلے میں عمران خان کو کسی بھی عوامی عہدے پر انتخاب یا تعیناتی کے لیے پانچ سال کے لیے نا اہل قرار دیا ہے۔