سعودی عرب: عمرہ ویزے پرآنے والے اب مملکت کے کسی بھی شہرکاسفرکرسکتے ہیں

بصیرت نیوزڈیسک
سعودی وزارت حج و عمرہ نے کہا ہے کہ ’عمرہ ویزے پر آنے والے مکہ مکرمہ اور مدینہ منورہ سمیت سعودی عرب کے کسی بھی شہر کا سفر کرسکتے ہیں۔ مملکت کے کسی بھی علاقے میں آ جاسکتے ہیں‘۔
اخبار 24 کے مطابق وزارت حج و عمرہ نے بیان میں کہا کہ ’ماضی میں عمرہ ویزے کا انتہائی دورانیہ 30 دن ہوا کرتا تھا۔ اب اسے بڑھا کر نوے دن کر دیا گیا ہے۔‘
بیان میں کہا گیا کہ ’ویزے سے زیادہ قیام غیر قانونی ہوگا جو زائرین نوے دن سے زیادہ مملکت میں قیام کریں گے انہیں سعودی عرب میں قانون عمرہ کی خلاف ورزی پر سزا دی جائے گی‘۔
وزارت حج و عمرہ کا کہنا ہے کہ ’بیرون مملکت کے عمرہ زائرین کو سال میں ایک سے زیادہ مرتبہ عمرہ ویزا حاصل کرنے کی اجازت ہے۔ انہیں مملکت آتے وقت داخلہ ویزا فیس ادا کرنا ہوگی‘۔
یاد رہے کہ سعودی وزیر حج نے کہا تھا کہ ’نسک پلیٹ فارم کے ذریعے آن لائن عمرہ و زیارت ویزوں کا اجرا آسان بنادیا گیا ہے۔ اب زیادہ آسانی اور تیزی سے عمرہ ویزے جاری کرنا ممکن ہو گیا ہے۔‘
’پہلے عمرہ ویزے کا دورانیہ ایک ماہ ہوتا تھا۔ اب دنیا کے کسی بھی ملک سے آنے والے عمرہ زائرین کو تین ماہ تک مملکت میں قیام کی سہولت دی گئی ہے۔‘
سعودی وزارت حج و عمرہ نے ’اعتمرنا’ ایپ کی جگہ ’نسک‘ ایپ کا اجرا سعودی عرب آنے والے عمرہ زائرین کی سہولت کے لیے کیا ہے۔
نسک ایپ کو وزارت حج وعمرہ اور سیاحت اتھارٹی کے تعاون سے ڈیزائن کیا گیا ہے نیز اس میں مختلف قسم کے پیکیجز متعارف کرائے گئے ہیں۔
نسک کے ذریعے عمرہ زائرین ویزے کے علاوہ سفر کے لیے تمام ضروری اشیا، پیکیجز، ہوٹل اور ٹیکسی وغیرہ کی بکنگ اور دیگر خدمات بک کرا سکتے ہیں۔
ایپ کے ذریعے عمرہ کمپنیاں بھی اپنی سروسز فراہم کریں گی جبکہ پہلے کام کرنے والی ویب سائٹ ’مقام‘ بھی وقتی طور پر کام کرتی رہے گی۔