ناصر،جنید قتل معاملہ : 8ملزمین کی شناخت ، خون کے دھبوں والی اسکارپیو برآمد

نئی دہلی (ایجنسی) ہریانہ کے لوہارو میں دو مسلم نوجوانوں ناصر اور جنید کو زندہ جلائے جانے کے معاملے میں کچھ اہم پیش رفت کی خبریں سامنے آ رہی ہیں۔ بھرت پور ضلع باشندہ دونوں نوجوانوں کے قتل سے متعلق تفتیش جاری ہے اور راجستھان پولیس نے اب کچھ اہم انکشافات کیے ہیں۔ پولیس کی طرف سے مطلوبہ 8 ملزمین کی فہرست جاری کر دی گئی ہے اور پولیس نے اس گاڑی کو بھی ضبط کر لیا ہے جس میں ملزمین نے جنید اور ناصر کے ساتھ مار پیٹ کی تھی۔

راجستھان کے اے ڈی جی کرائم دنیش ایم این بدھ کے روز بھرت پور پہنچے اور پولیس افسران کے ساتھ کرائم کنٹرول کو لے کر ایک میٹنگ کی۔ اس دوران انھوں نے بتایا کہ ناصر-جنید قتل معاملہ کے 8 ملزمین کی شناخت ہو گئی ہے جنھیں پکڑنے میں راجستھان پولیس کی مدد ہریانہ پولیس بھی کر رہی ہے۔ اس دوران بھرت پور آئی جی گورو شریواستو نے بتایا کہ گرفتار ملزم رنکو سینی نے پوچھ تاچھ میں بتایا ہے کہ اس بہیمانہ قتل میں 8 لوگ شامل تھے جن میں سے 2 کا تعلق میوات سے ہے۔ پولیس کے مطابق ملزمین کے نام ہیں انل، شری کانت، کالو، کشور، مونو، وکاس، ششی کانت اور انل (بھیوانی باشندہ)خون لگی ہوئی برآمد اسکارپیو کار کے بارے میں بات کرتے ہوئے بھرت پور آئی جی گورو شریواستو کا کہنا ہے گاڑی کی سیٹ پر خون کے نشان پائے گئے ہیں اور گاڑی برآمد ہونے کے بعد اسی وقت بھرت پور سے ایف ایس ایل ٹیم موقع پر بھیجی گئی اور ہریانہ پولیس کی موجودگی میں گاڑی سے سیمپل لیے گئے ہیں۔