ماب لنچنگ، ہیٹ اسپیچ جیسے معاملات میں سخت کارروائی کی جائے گی، امت شاہ نے مسلمانوں کے وفدکویقین دلایا

نئی دہلی(ایجنسی) مسلم مذہبی رہنماؤں کے ایک وفد نے وزیر داخلہ امت شاہ سے ملاقات کی ہے۔ یہ ملاقات منگل کی رات گیارہ بجے ہوئی۔ بتایا جا رہا ہے کہ اس ملاقات کے دوران ملک میں بڑھتے ہوئے اسلامو فوبیا پر گفتگوہوئی ۔ وفد کی قیادت مولانا محمود مدنی کر رہے تھے۔ مولانا مدنی کے علاوہ وفد میں مسلم پرسنل لا بورڈ کے کمال فاروقی، نیاز فاروقی اور پروفیسر اختر الواسع شامل تھے۔
وزیر داخلہ کے ساتھ ملاقات میں رام نومی کے موقع پر بنگال، بہار، مہاراشٹر میں ہوئے تشدد اور بہار کے نالندہ میں مدرسہ کو نذر آتش کرنے پر تبادلہ خیال کیا گیا۔ اس کے ساتھ ہی ہم جنس شادی اور یکساں سول کوڈ پر بھی بات ہوئی۔ مسلم وفد نے امت شاہ کو مسلمانوں سے متعلق مسائل کے بارے میں ایک پریزنٹیشن بھی دیا۔
ملاقات کے دوران ہریانہ میں جنید اور ناصر کو زندہ جلانے پر بات ہوئی۔ اس کے ساتھ ہی مسلم مذہبی رہنماؤں نے بھی بی جے پی لیڈروں کے بیانات کو لے کر وزیر داخلہ امت شاہ کے سامنے اپنی بات رکھی۔ انہوں نے کہا کہ اکثر حکومت کی خاموشی سے مسلمانوں کو تکلیف ہوتی ہے۔
ساتھ ہی وزیر داخلہ امت شاہ نے کہا کہ ماب لنچنگ اور ہیٹ اسپیچ جیسے معاملات پر سخت کارروائی کی جائے گی۔ وفد نے کرناٹک میں پسماندہ مسلمانوں کے لیے ریزرویشن کے خاتمے پر بھی تشویش کا اظہار کیا۔ مذہبی رہنماؤں نے یکساں سیول کوڈ کے بارے میں امت شاہ کا موقف جاننے کی کوشش کی، حالانکہ وزیر داخلہ نے فی الحال اس پر کچھ بھی کہنے سے انکار کردیا۔