ہندوستان نے آبادی میں چین کوپیچھے چھوڑا،اقوام متحدہ نے جاری کی رپورٹ

نئی دہلی(ایجنسی) ہندوستان کی آبادی بڑھ کر 142.86 کروڑ ہو گئی ہے اور یہ چین کو پیچھے چھوڑ کر دنیا کا سب سے زیادہ آبادی والا ملک بن گیا ہے۔ یہ اقوام متحدہ کا دعویٰ ہے۔ اقوام متحدہ کے ورلڈ پاپولیشن ڈیش بورڈ کے مطابق چین کی آبادی 142.57 کروڑ ہے۔ اقوام متحدہ کی طرف سے آج جاری کردہ اعداد و شمار سے پتہ چلتا ہے کہ ہندوستان چین کو پیچھے چھوڑتے ہوئے دنیا کا سب سے زیادہ آبادی والا ملک بن گیا ہے۔ 1950 میں آبادی کے اعداد و شمار جمع کرنے کے عمل کے آغاز کے بعد یہ پہلا موقع ہے جب ہندوستان سب سے زیادہ آبادی والے ممالک کی اقوام متحدہ کی فہرست میں سرفہرست ہے۔
چین کی آبادی میں گزشتہ سال 1960 کے بعد پہلی بار کمی آئی، جب سابق رہنما ماؤ زے تنگ کی تباہ کن زرعی پالیسیوں کے باعث لاکھوں لوگ بھوک سے مر گئے۔
شرح پیدائش میں کمی اور افرادی قوت کی عمر بڑھنے کی وجہ سے چین کو آبادی میں کمی کا بھی سامنا ہے۔ چین نے کئی خطوں میں شرح پیدائش کو بڑھانے کے منصوبوں کا بھی اعلان کیا ہے – لیکن سرکاری کوششیں اب تک اس کمی کو واپس لانے میں ناکام رہی ہیں۔
ہندوستان کی موجودہ آبادی کتنی ہے؟ اس بارے میں کوئی حالیہ سرکاری اعداد و شمار موجود نہیں ہیں، کیونکہ 2011 کے بعد سے کوئی مردم شماری نہیں ہوئی ہے۔ بھارت میں مردم شماری ایک دہائی میں ایک بار ہوتی ہے جو 2021 میں ہونی تھی لیکن کورونا وائرس وبائی امراض کی وجہ سے اس میں تاخیر ہوئی ہے۔