المناک ٹرین حادثے میں 13 افراد جاں بحق، 50 زخمی، ریسکیوآپریشن جاری

نئی دہلی(ایجنسی) آندھرا پردیش میں ایک ہولناک ٹرین حادثے میں 13 افراد ہلاک اور 50 زخمی ہوگئے۔ ایسٹ کوسٹ ریلوے کے حکام نے بتایا کہ پالسا مسافر ٹرین اتوار کی شام سات بجے کے قریب وشاکھاپٹنم سے تقریباً 40 کلومیٹر دور کانتاپلے کے مقام پر رائاگڈا مسافر ٹرین سے پیچھے سے ٹکرائی، جس کی وجہ سے اس کی تین بوگیاں پٹری سے اتر گئیں۔ ہاوڑہ-چنئی لائن پر ایک مسافر ٹرین سگنل سے آگے نکل گئی اور پیچھے سے آنے والی دوسری ٹرین سے ٹکرا گئی۔
وشاکھاپٹنم اور پالاسا کے درمیان ایک خصوصی مسافر ٹرین الامانڈا اور کانٹاپلے کے درمیان مین لائن پر محدود رفتار پر تھی کہ سگنل کی عدم موجودگی کی وجہ سے اس کو پیچھے سے ویزاگ-ریاگڈا مسافر ٹرین نے ٹکر مار دی۔
ڈی آر ایم سوربھ پرساد نےہندی نیوزچینل این ڈی ٹی وی کو بتایا کہ اس ٹرین حادثے میں وشاکھاپٹنم-پالسا ٹرین کے آخری تین ڈبے اور انجن اور وشاکھاپٹنم-رایاگڑا مسافر ٹرین کے دو ڈبے پٹری سے اتر گئے۔ مال گاڑی کی ایک بوگی پٹری سے اتری اور ایک طرف جاگری۔
وجیا نگرم کلکٹر نا گ لکشمی نے این ڈی ٹی وی کو تصدیق کی کہ کل رات مرنے والوں کی تعداد نو سے بڑھ کر 13 ہو گئی۔ انہوں نے امید ظاہر کی کہ بچاؤ کی کوششیں آج صبح تک مکمل ہو جائیں گی۔انہوں نے کہا کہ کم از کم 50 زخمی ہیں اور مختلف ہسپتالوں میں زیر علاج ہیں۔
ایسٹ کوسٹ ریلوے کے سی پی آر او وشواجیت ساہو نے آج صبح این ڈی ٹی وی کو بتایا کہ 18 ٹرینیں منسوخ کر دی گئی ہیں، 22 ٹرینوں کا رخ موڑ دیا گیا ہے۔ انہوں نے کہا کہ حادثہ ویزاگ-ریاگڈا لوکو پائلٹ کی غلطی کی وجہ سے ہوا ہے جس کی اس حادثے میں موت ہو گئی۔ ریلوے ذرائع نے پہلے کہا تھا کہ لوکو پائلٹ نے سگنلنگ پر توجہ نہیں دی ہو گی۔
کل شام کو جائے وقوعہ سے حاصل کی گئی تصاویر میں ڈبے پٹری سے اترے اور لوگوں کا ہجوم دکھایا گیا ہے۔ ریلوے کے وزیر اشونی وشنو نے کہا کہ پٹری سے اترے اور متاثرہ ڈبے کو چھوڑ کر باقی کو آدھی رات تک صاف کر دیا گیا۔
آندھرا پردیش کے وزیر اعلی وائی ایس جگن موہن ریڈی نے بھی حادثے پر افسوس کا اظہار کیا اور ریاست کے عہدیداروں کو ہدایت دی کہ وہ مرنے والوں کے لواحقین کو فی کس 10 لاکھ روپئے اور زخمیوں کو 2 لاکھ روپئے ایکس گریشیا دیں۔ ایک سرکاری بیان کے مطابق، انہوں نے دیگر ریاستوں سے مرنے والوں کے لواحقین کے لیے 2-2 لاکھ روپے اور زخمیوں کے لیے 50،000 روپے کا اعلان بھی کیا۔اس کے علاوہ زخمیوں کے لیے 2-2 لاکھ روپے اور زخمیوں کے لیے 50،000 روپے کا اعلان کیا۔
وزیر اعظم نریندر مودی نے صورتحال کا جائزہ لیا ہے اور جان و مال کے نقصان پر افسوس کا اظہار کیا ہے۔ انہوں نے حادثے میں جاں بحق ہونے والوں کے لواحقین کے لیے 10 لاکھ روپے، شدید زخمیوں کے لیے 2 لاکھ روپے اور معمولی زخمیوں کے لیے 50 ہزار روپے دینے کا اعلان کیا ہے۔
وزیر ریلوے نے چیف منسٹر وائی ایس جگن موہن ریڈی سے بھی بات کی جنہوں نے حادثے پر گہرے رنج و غم کا اظہار کیا اور زخمیوں کے علاج کو یقینی بنانے کے لیے تمام انتظامات کا حکم دیا۔ جگن موہن ریڈی نے بھی اس واقعہ کے بارے میں وقتاً فوقتاً اپ ڈیٹس طلب کی ہیں۔
ریلوے ذرائع نے بتایا کہ دہلی ریلوے کی وزارت کا وار روم صورتحال پر نظر رکھے ہوئے ہے۔ ایسٹ کوسٹ ریلوے نے ہیلپ لائن نمبر جاری کیے ہیں (بھوبنیشور – 0674-2301625، 2301525، 2303069، اور والٹیر – 0891-2885914)۔
اس واقعے سے تقریباً پانچ ماہ قبل، اڈیشہ میں تین ٹرینوں کے ایک ہولناک حادثے میں 280 سے زیادہ مسافروں کی موت ہو گئی تھی۔ 2 جون کو بہناگا بازار اسٹیشن کے قریب پیش آنے والے اس حادثے میں شالیمار-چنئی سنٹرل کورومنڈیل ایکسپریس، بنگلور-ہاؤڑا سپر فاسٹ ایکسپریس اور ایک مال ٹرین شامل تھی۔