ممبئی ایئرپورٹ کو بم سے اُڑانے کی دھمکی، بِٹ کوائن مانگنے والا ملزم گرفتار

ممبئی(ایجنسی) اے ٹی ایس نے ممبئی ایئرپورٹ کو اُڑانے کی دھمکی دینے کے الزام میں کیرالہ کے ایک رہائشی کو گرفتار کر لیا ہے۔
ممبئی میں واقع چھترپتی شیواجی مہاراج ایئرپورٹ پر حملے کی دھمکی دینے والے ملزم کو مہاراشٹر کے اے ٹی ایس نے گرفتار کیاہے۔
جمعے کو ہندی نیوزچینل این ڈی ٹی وی پر شائع ہونے والی ایک رپورٹ کے مطابق ملزم نے مبینہ طور پر دھمکی دی تھی کہ اگر اُسے بِٹ کوائن کرنسی کی شکل میں 10 لاکھ ڈالر نہیں دیے گئے تو وہ ایئرپورٹ کو دھماکے سے اُڑا دے گا۔
اے ٹی ایس کے ایک افسر کے مطابق یہ دھمکی جمعرات کو ایئرپورٹ حکام کو صبح تقریباً 11 بجے ایک ای میل کے ذریعے موصول ہوئی تھی۔
ای میل میں کہا گیا تھا کہ ’یہ آپ کے ایئرپورٹ کے لیے آخری وارننگ ہے۔ ہم اگلے 48 گھنٹوں میں ایئرپورٹ کا ٹرمنل 2 اُڑا دیں گے اگر ہمیں بتائے گئے پتے پر 10 لاکھ ڈالرز بِٹ کوائن کرنسی کی شکل میں ادا نہیں کیے گئے۔‘
دھمکی موصول ہونے کے بعد ایئرپورٹ کی انتظامیہ نے اس کا مقدمہ سہار پولیس سٹیشن میں درج کروایا تھا۔
اے ٹی ایس کے سائبر سیل نے اس معاملے کی تحقیقات شروع کی اور انہیں معلوم ہوا کہ دھمکی آمیز ای میل کیرالہ کے ایک مقام سے ارسال کیا گیا ہے۔
میڈیا کے مطابق کیرالہ میں ملزم کو مہاراشٹر کے افسران نے گرفتار کیا اور اُسے ممبئی منتقل کیا جا رہا ہے۔
خیال رہے اے ٹی ایس کی جانب سے ملزم کی شناخت کے حوالے سے اب تک کوئی بیان جاری نہیں کیا گیا ہے۔