علی گڑھ مسلم یونیورسٹی کے طلبہ نے”راشٹر پرتھم“ مہم کے تحت ہندوستانی مسلح افواج سے اظہاریکجہتی کے لیے عظیم الشان مارچ نکالا

علی گڑھ، 9 مئی: علی گڑھ مسلم یونیورسٹی (اے ایم یو) کے طلبہ، جن میں این سی سی اور این ایس ایس کے رضاکار اور مختلف شعبہ جات و اسکولوں کے طلبہ و طالبات شامل تھے نے پاکستان کی جانب سے اشتعال انگیزیوں کے جواب میں کیے گئے ”آپریشن سندور‘‘کے تحت ہندوستان کی کارروائیوں کے ساتھ اظہار یکجہتی کے لیے یونیورسٹی میں ڈَک پوائنٹ سے بابِ سیّد تک ایک عظیم الشان مارچ نکالا۔

شرکاء نے قومی پرچم اٹھا رکھے تھے اور وہ اتحاد و حب الوطنی کے نعرے لگا رہے تھے، جس سے ماحول قومی فخر اور اجتماعی عزم کے احساس سے لبریز تھا۔

مارچ میں شریک طلبہ نے ہندوستانی فوجیوں کی جرأت، قربانی اور وفاداری کو خراجِ تحسین پیش کرتے ہوئے کہا کہ وہ ملک کے دفاع میں ہر چیلنج کا بے مثال بہادری سے سامنا کرتے ہیں۔ انہوں نے لیفٹیننٹ کرنل صوفیہ قریشی اور میجر ویومیکا سنگھ کی قیادت اور پیشہ ورانہ صلاحیتوں کو سراہا اور کہا کہ حالیہ آپریشن میں ان کا مثالی کردار ملک و قوم کے لیے باعث فخر ہے۔

طلبہ نے مسلح افواج کی جرأت اور ان کے عزم کو سلام پیش کیا اور ”آپریشن سندور“ کے دوران ان کی پُر حوصلہ اور حکمت عملی پر مبنی کارروائیوں کو سراہا۔ انہوں نے وزیر اعظم نریندر مودی کی قیادت میں ملک کی خودمختاری اور سلامتی کے تحفظ کے لیے ہندوستانی فوج کے عزم کی تعریف کی۔ طلبہ نے کہا، ”ہم ہر حال میں اپنے ملک کے امن و سلامتی اور سا لمیت کی حفاظت کے لیے تیار ہیں۔“ انہوں نے کہا کہ مسلح افواج کی شجاعت اور حکمت عملی پر مبنی فیصلے ہمیں احساس فخر سے لبریز کرتے ہیں اور ہم ملک کی خدمت کے لیے اپنا بھرپور کردار ادا کرنے کا عہد کرتے ہیں۔

اس مارچ میں یونیورسٹی کے سینئر اہلکار، این سی سی افسران، این ایس ایس پروگرام افسران، اساتذہ اور غیر تدریسی عملے کے ارکان نے شرکت کی اور طلبہ کے جذبہ حب الوطنی اور اتحاد کے مظاہرے کے لئے ان کی بھرپور حوصلہ افزائی کی۔

مارچ کا اختتام جوش و خروش سے بھرپور نعروں کے ساتھ ہوا، جس نے قومی اتحاد اور مسلح افواج سے گہری وابستگی کے تئیں اے ایم یو کے طلبہ کے عزم کو مستحکم کیا۔

ریلی کے علاوہ، این سی سی اے ایم یو 8 یو پی بٹالین کے کیڈٹس نے سول ڈیفنس کی تیاری کے حوالے سے ایک آگاہی پروگرام بھی منعقد کیا۔