مسولی میں جلد قائم ہوگا پالی ٹیکنک، تکنیکی تعلیم کے فروغ میں اہم پیش رفت: ڈاکٹر عمار رضوی

رفیع احمد قدوائی میموریل ٹرسٹ کی جانب سے نئے انتظامی ہال کا افتتاح

بارہ بنکی:(پریس ریلیز/ابوشحمہ انصاری) مسولی واقع رفیع احمد قدوائی میموریل ٹرسٹ کی جانب سے نئے تعمیر شدہ انتظامی ہال کی افتتاحی تقریب میں سماجی، تعلیمی اور عوامی خدمات سے وابستہ متعدد معزز شخصیات نے شرکت کی۔ رفیع قدوائی ٹرسٹ کے چیئرمین و صابق ریاستی وزیر ڈاکٹر عمار رضوی نے مختلف لوگوں کو سماجی خدمات کے لئے اعزاز دیے۔

تقریب کا آغاز عظیم مجاہدِ آزادی، ممتاز قومی رہنما اور حکومتِ ہند میں سابق وزیر خوراک و رسد مرحوم رفیع احمد قدوائی کی مزار پر گل پوشی اور فاتحہ خوانی سے ہوا۔ اس موقع پر سابق وزیر فرید محفوظ قدوائی، ٹرسٹ کے رکن فیض قدوائی، آی اے ایس، پروفیسر ماہ رخ مرزا، صابق وایس چانسلر، خواجہ معین الدین چشتی یونیورسٹی، شعیب قدوائی، پرنسپل صبا ظہیر، ٹرسٹ نمائندہ سریندر پانڈے، آشارام اور دیگر معزز افراد موجود رہے۔

اس کے بعد رفیع احمد قدوائی میموریل ٹرسٹ کی جانب سے ایک پروقار تقریبِ اعزاز منعقد کی گئی، جس میں مختلف شعبۂ حیات سے تعلق رکھنے والی سماجی خدمات انجام دینے والی شخصیات کو تہنیت پیش کی گئی۔ مقررین نے مرحوم رفیع احمد قدوائی کی قومی خدمات کو خراجِ عقیدت پیش کرتے ہوئے کہا کہ انہوں نے ملک کی تعمیر و ترقی، جمہوری اقدار کے استحکام اور قومی یکجہتی کے فروغ میں نمایاں کردار ادا کیا۔

تقریب کے اختتام پر ٹرسٹ کی سالانہ میٹنگ بھی منعقد ہوئی، جس میں تعلیمی سرگرمیوں کے فروغ، ادارے کی توسیع اور مستقبل کے منصوبوں سے متعلق کئی اہم فیصلے کیے گئے۔

سابق کارگزار وزیر اعلیٰ اور آل انڈیا مائناریٹیز فورم فار ڈیموکریسی کے صدر ڈاکٹر عمار رضوی، جو رفیع احمد قدوائی میموریل ٹرسٹ کے چیئرمین بھی ہیں، نے اپنے صدارتی خطاب میں کہا کہ مسولی میں بہت جلد پالی ٹیکنک ادارہ قائم کیا جائے گا، جس سے علاقے کے نوجوانوں کو تکنیکی اور روزگار پر مبنی تعلیم حاصل کرنے کے وسیع مواقع میسر آئیں گے۔ انہوں نے کہا کہ اس وقت ٹرسٹ کے زیرِ اہتمام انٹر کالج، زیرِ تعمیر ڈگری کالج اور کمپیوٹر سینٹر کامیابی کے ساتھ چلائے جا رہے ہیں، جبکہ پالی ٹیکنک کے قیام سے تکنیکی تعلیم کے میدان میں ایک بڑی ضرورت پوری ہوگی۔

ڈاکٹر عمار رضوی نے رفیع احمد قدوائی مرحوم کی حیات و خدمات پر روشنی ڈالتے ہوئے کہا کہ انہوں نے ملک و قوم کی بے لوث خدمت انجام دی۔ بالخصوص مسئلۂ کشمیر کے سلسلے میں ان کی خدمات کو ہمیشہ قدر کی نگاہ سے دیکھا جائے گا۔ انہوں نے کہا کہ مرحوم قدوائی کی تعلیمی، سماجی اور قومی خدمات نئی نسل کیلئے مشعلِ راہ ہیں۔

تقریب کے اختتام پر علاقے میں تعلیم کے فروغ، سماجی بیداری اور ترقیاتی سرگرمیوں کو مزید مستحکم بنانے کے عزم کا اعادہ کیا گیا۔یہ اطلاع آل انڈیا ماٸنا ریٹیز فورم فار ڈیمو کریسی کے شعبہ نشرواشاعت کے سیکرٹری ابوشحمہ انصاری نے فراہم کی۔