یہ میری مناجات 

ام ماریہ فلک، ممبرا

مرے اللہ! میری التجا کی لاج رکھ لینا 

اطاعت کی عبادت کی، دعا کی لاج رکھ لینا

مرے اللہ ! یہ دنیا ترے رحم و کرم پر ہے

تری رحمت کی سائل ہے، گدا کی لاج رکھ لینا

مرے اللہ! تو احوال ِ دل سے خوب واقف ہے

صدائے دل کو سن لینا ، نوا کی لاج رکھ لینا

مرے اللہ! بس تیرا سہارا ہی سہارا ہے

ہمارے اس یقیں کی آسرا کی لاج رکھ لینا

مرے اللہ! تیرا ذکر ہی تسکیں کا باعث ہے

ادا ہوتی ہوئی حمد و ثنا کی لاج رکھ لینا

مرے اللہ! تیری ذات سے ملتی تشفی ہے

مرے اللہ! پھر ہر اک دَوا کی لاج رکھ لینا 

مرے اللہ! آنکھوں کو شعورِ پارسائی دے

مرے اللہ! نگاہوں کی حیا کی لاج رکھ لینا 

تو ہی اوّل، تو ہی آخر، تو ہی ظاہر، تو ہی باطن 

ہے تُو ہی ابتدا ، پھر انتہا کی لاج رکھ لینا

 مرے اللہ!  اب تو زندگی آسان ہو جائے

مرے اللہ! اب دستِ دعا کی لاج رکھ لینا

 مرے اللہ! جیسے اک جہاں کی لاج رکھی ہے

بس ایسے ہی مری ہر اک دعا کی لاج رکھ لینا