گجرات :موربی برج حادثے والے دن 3165 ٹکٹ فروخت ہوئے، رپورٹ میں انکشاف

نئی دہلی(ایجنسی) موربی پل کی ایف ایس ایل رپورٹ میں اوریوا اور میونسپل کارپوریشن کی بدعنوانی اور مجرمانہ غفلت کا انکشاف ہوا ہے۔ اوریوا گروپ جس کے پاس پل کی دیکھ بھال، آپریشن اورسیکورٹی کا ٹھیکہ تھا۔ 30 اکتوبر کو، جس دن پل گرا، 3165 ٹکٹ جاری کیے گئے۔ اس کابوجھ برداشت کرنے کی صلاحیت کا کبھی اندازہ نہیں لگایا گیا۔
رپورٹ کے مطابق اوریوا کی طرف سے تعینات گارڈز اور ٹکٹ کلیکٹر یومیہ اجرت پر کام کرنے والے مزدور تھے۔ محافظوں کو کبھی بھی حفاظتی پروٹوکول کے بارے میں نہیں بتایا گیا اور پل پر کتنے لوگوں کو جانے کی اجازت ہونی چاہئے۔ تاروں کو زنگ لگ گیا تھا۔ زاویے ٹوٹ گئے تھے اور کیبلز کو اینکر سے جوڑنے والے بولٹ ڈھیلے ہو گئے تھے۔
30 اکتوبر کو گجرات کے موربی میں ماچھو ندی پر برطانوی دور کے پل کے گرنے سے 135 سے زائد افراد اپنی جانوں سے ہاتھ دھو بیٹھے۔ 31 اکتوبر کو، پولس نے نو افراد کو گرفتار کیا، جن میں موربی پل کا انتظام کرنے والے اوریوا گروپ کے چار افراد بھی شامل ہیں۔ پل کی دیکھ بھال اور آپریشن میں ملوث کمپنیوں کے خلاف مقدمہ درج کر لیا گیا ہے۔