دیئے کی لَو سے جو آنکھ اپنی لڑا رہا ہے

مسیح الدین نذیری معروف پورہ مئو یوپی

غزل

دیئے کی لَو سے جو آنکھ اپنی لڑا رہا ہے

کوئی کسک ہے جسے وہ خود میں جلارہا ہے

لگی ہوئی ہے مری جڑوں کو گھٹن کی دیمک

مرے ہنر کو تمہارا غم جیسے کھارہا ہے

یہ کیا ستم ہے کہ مجھ پہ دعوی کرے ہے کوئی

اسے کوئی اور شخص اپنا بتارہا ہے

مجھے کہیں دور وہ نظر آرہا ہے لیکن

میں کش مکش میں ہوں آرہا ہے کہ جارہا ہے

کسی کو ڈولی میں اپنی لے جارہا ہے کوئی

کوئی ہے بے بس جو ہونٹ اپنے چبارہا ہے

بتا تو دیتا کہ جارہا ہے تو کیا سبب ہے؟

بس اک اذیت کا عمر بھر سامنا رہا ہے

میں مسکرا کر بتارہا ہوں کہ ٹھیک ہوں میں

وہ سن رہا ہے جواب اور مسکرا رہا ہے

کسی پہ لکھنا، کسی کو پڑھنا کسی کو سننا

یہی نذیری گئے دنوں مشغلہ رہا ہے

مسیح الدین نذیری پورہ معروف مئو