ایک بار پھر کورونا کی دہشت، ماہرین نے دیا احتیاطی اقدامات اختیار کرنے اور بھیڑ سے دور رہنے کا مشورہ

نئی دہلی(ذرائع) کورونا وبا کے بڑھتے معاملات سے ملک میں خوف کا ماحول پایا جارہا ہے۔ ملک میں ایک بار پھر کیسس بڑھ رہے ہیں۔ قومی دارالحکومت نئی دہلی میں سات افراد میں کورونا وائرس کی تصدیق ہوئی ہے۔ محکمہ صحت نے دہلی کے ساتھ ساتھ ملک بھر میں کووڈ ویرینٹ جے این۔ون کے کیسس کو دیکھتے ہوئے محتاط رہنے کا مشورہ دیا ہے۔ وزارت صحت کی جانب سے جاری کردہ ڈیٹا کے مطابق حکومت کووڈ کا سامنا کرنے کے لئے تیار ہیں۔ اسپتالوں میں 6,157 بستر ہیں۔ اور سات افراد کو داخل کیا گیا ہے۔ اسی طرح 6150 بستر ابھی بھی خالی ہیں۔محکمہ صحت کی طرف سے جاری کردہ اعداد و شمار کے مطابق، قومی دارالحکومت میں 20,14,448 کووڈ کیس رپورٹ ہوئے ہیں۔ دریں اثنا کووِڈ کیسس کی بڑھتی ہوئی تعداد کے پس منظر میں احتیاطی تدابیر اختیار کرنے کا مشورہ دیا گیا ہے۔ ماہرینِ صحت بھیڑ والے علاقوں میں ماسک پہننے کا مشورہ دے رہےہیں۔ ماہرین نے خبردار کیا ہے کہ کرسمس، جنوری اور نئے سال کی تقریبات کے ساتھ مزید کیسس بڑھنے کا امکان ہے۔ تقریباً سات ماہ بعد غازی آباد میں کووِڈ کا پہلا کیس سامنے آیا۔ پرائیویٹ لیب میں کووِڈ کا ٹیسٹ مثبت پایاگیا۔ ڈسٹرکٹ سرویلنس آفیسر آر کے گپتا نے کہا کہ لوگوں کو محتاط رہنا چاہیے کہ وہ بھیڑ والی جگہوں پر نہ جائیں۔