شاخِ رغبت پہ برگ و بار نہیں

 

از قلم :افتخار راغب، جدہ سعودی عرب

 

شاخِ رغبت پہ برگ و بار نہیں

غم میں ہیں پیڑ، غم گسار نہیں

 

تجھ سے کیا دشمنی کا خوف مجھے

دوستوں میں ترا شمار نہیں

 

بے شجر برگ کے لیے اے دل

موسمِ گل بھی سازگار نہیں

 

اک اشارے پہ دوڑ آؤں گا

زخم بھرنے کا انتظار نہیں

 

کس کو اپنا جہاں نہیں محبوب

کس کو اپنی زمیں سے پیار نہیں

 

میں تو دل کی لگی کا مارا ہوں

دل لگی وجہِ انتشار نہیں

 

تیرے ہونٹوں کا چل گیا جادو

اپنی آنکھوں پہ اعتبار نہیں

 

اب بھی دل کے لغت میں سب کچھ ہے

صرف اک حرفِ اختیار نہیں

 

رخ پہ عکسِ طمانیت روشن

شیشۂ قلب پر غبار نہیں

 

دور تک وادیِ تعصّب ہے

ان پہاڑوں میں آبشار نہیں

 

جل رہا ہے حروف سے کاغذ

لکھ رہا ہوں کہ بے قرار نہیں

 

تیری آنکھوں میں ہاں چمکتی ہے

توٗ زباں سے کہے ہزار نہیں

 

میں سرشتاً درخت ہوں راغبؔ

بغض و نفرت مرا شعار نہیں

 

افتخار راغبؔ

جدہ، سودی عرب